Sýyq qarýdy zańsyz saýdalaýǵa tosqaýyl qoıyldy

Mundaı oń dınamıkaǵa Bas kólik prokýratýrasy, Máde­nıet jáne aqparat mınıstr­ligi jáne Kóliktegi polısııa departamentiniń halyqara­lyq marketpleıstermen memoran­dýmǵa qol qoıýy yqpal etken. Iаǵnı tanymal saýda alańdarynda tyıym salynǵan taýarlardyń zańsyz jarnamasy men satylymyn der kezinde anyqtaý, buǵattaý boıynsha birlesken sharalar kólik nysandaryndaǵy qylmys deńgeıiniń tómendeýine sep bolyp otyr. Degenmen marketpleısterde sýyq qarýdy jarnamalaý derekteri áli de kezdesip júr. Osy baǵytta jumysty údetý úshin «Atameken» astanalyq kásipkerler palatasy alańynda jaýapty memlekettik mekemeler men platforma ókilderi keńes ótkizdi.

– Basty maqsat – «Zań jáne tártip» tujyrymdamasyn iske asyrý aıasynda sýyq qarýdyń satylýyn boldyrmaý, olardyń qoǵamdaǵy, ásirese jastar arasyndaǵy aınalymyn azaıtý, sondaı-aq halyq pen saýda sýbektilerine sýyq qarýdy zańsyz alyp júrý, ótkizý nemese satý boıynsha Qylmystyq kodeks­tiń 287-baby negizinde qyl­mystyq jaýap­kershilik kózdel­genin keńinen túsin­dirý. Eki jylda elde mundaı 1 600-den asa qylmystyq is tirkeldi. Onyń ishin­degi 260 derek kólik salasyna qatys­ty, – dedi Bas kólik prokýrorynyń aǵa kómekshisi Abzal Baqashbaev.

Jalpy Kaspi, Halyk Market, OLX, Satu.kz, Ozon.kz, Wildberries jáne basqa da satý platformalarynda tyıym salyn­ǵan zattar­dyń erkin saýdasy eldegi qu­qyq­buzý­shylyqtyń ósýine tikeleı ne janama áser etedi. Oǵan dálel, Jambyl oblysynda kámeletke tolmaǵan jasóspirim­niń kastetpen soqqy alý saldarynan qaza tabý faktisi, tipti Astana qalasy­nyń halyqaralyq áýejaıynda bir azamattyń sýyq qarýdan jaraqat alyp, aýrýhanaǵa jetkizilýi syndy derekter jeterlik. Osy jyldyń ózinde sýyq qarýdy zańsyz satyp alý boıynsha 52 derek tirkeldi. Onyń 34-i marketpleıster arqyly, 18-i ózge saýda arnalary arqyly júzege asqan.

– Komıtet tarapynan marketpleıs­terge turaqty monıtorıng júrgiziledi. Jyl ishinde tirkelgen sýyq qarý satýǵa qatysty jarnama ornalastyrylǵany týraly dálelder bar. Iаǵnı olar óz tarapynan tyıym salynǵan taýarlardy ózdiginen súzgiden ótkizý tetikterin tolyq iske asyrmaı otyr, – dedi Mádenıet jáne aqparat mınıstrligi Aqparat komıteti tóraǵasynyń orynbasary Ilııas Esmaǵul.

Bas kólik prokýratýrasy sýyq qarýdy satqan jáne satyp alǵandar jaýapqa tartylatynyn eskertedi. Naqtyraq aıtqanda, 180 aılyq eseptik kórsetkish kóleminde aıyppul salynady nemese qoǵamdyq jumysqa tartylady, tipti 50 táýlikke qamalýy múmkin.