Ońaltý ortalyǵy shamamen 2 gektarǵa jýyq jerdi alyp jatyr. Aq qaıyńy, qyz qaraǵaıy aralas qalyń aǵash arasynda turǵan keshen aýmaǵynda jeti ǵımarat bar. Onyń ekeýi 2002 jyly, tórteýi 2004–2008 jyldar aralyǵynda Prezıdent janyndaǵy sheteldik ınvestorlar keńesiniń jalpy otyrysyn ótkizýge daıyndyq sharalary barysynda salynǵan.
Balalar ortalyǵynyń ashylý rásimine oblys ákimi Qumar Aqsaqalov pen ǵımarattardy qaıta jóndeýden ótkizip, qajetti qural-jabdyqpen qamtamasyz etýge qyrýar qarjy bólgen «Qazaqstan halqyna» qoǵamdyq qorynyń basqarma tóraǵasy Lázzat Shyńǵysbaeva qatysty. Oblys ákiminiń aıtýynsha, buǵan deıin óńirde balalarǵa arnalǵan jalǵyz ońaltý ortalyǵy bolǵan.
– Ol jylyna 400 balaǵa deıin qabyldaıdy. Al jańadan ashylyp otyrǵan ortalyqtyń qyzmet kórsetý aıasy odan eki ese joǵary. Jańa ortalyq joǵary deńgeıdegi zamanaýı medısınalyq qurylǵylarmen jabdyqtalǵan. Tıisti daıarlyqtan ótken bilikti mamandar jumys isteıdi. Bizge «Qazaqstan halqyna» qory zor kómek kórsetti. 1 mlrd teńgeden astam qarjy bólip, oǵan buryn-sońdy bolmaǵan zamanaýı qural-jabdyqtar ornatyp berdi. Buryn mundaı tehnologııa Astana men Almatyda ǵana bolǵandyqtan, ata-analar sol qalalarǵa qatynaýǵa májbúr edi. Endi alysqa sabylmaı-aq, ózimizde de ońaltý sharalarynan ótýge múmkindik paıda bolyp otyr, – dedi Q.Aqsaqalov.
L.Shyńǵysbaeva «Qazaqstan halqyna» qoǵamdyq qory Qostanaı oblysyna 21 mlrd teńgege jýyq qarjy bólip, áleýmettik salany damytatyn irgeli jobalardy iske asyryp jatqanyn aıtty. Sonyń aıqyn bir dáleli – osy ortalyq.
– Bul – «Altyn standart» negizinde jasalǵan ortalyq. Nege biz elimizde joq jabdyqtardy ákeldik? О́ıtkeni áleýmettik salada óte mańyzdy standarttardy kóterýimiz kerek. Sol arqyly qyzmet sapasy artýy qajet. Búgin ózderińiz kórip otyrǵan qural-jabdyqtarǵa 700 mln teńge jumsaldy. Qalǵandary kelisim-sharttar aıasynda Japonııa, Shveısarııa, AQSh, Aýstralııa sııaqty elderden kele jatyr. Álemdik brendter tapsyryspen arnaıy jasalady. Degenmen qolda bar tehnıkalar jumysty tolyq bastaı berýge múmkindik beredi. Mundaǵy qamtylym jerge qonǵan ǵaryshkerdi ońaltýǵa qajetti jabdyqtardan esh kem emes, – dedi L.Shyńǵysbaeva.
Jalpy, óńirde psıhonevrologııalyq aýytqýǵa ushyraǵan, tirek-qımyl qozǵalysyna zaqym kelgen eki myńǵa jýyq bala bar. Ortalyq jyl saıyn 1,5 jastan 18 jasqa deıingi 900 balany emdep, reabılıtasııalyq qoldaý kórsetedi. Ortalyq aýmaǵyndaǵy jeti ǵımarattyń árqaısysy ártúrli saýyqtyrý qyzmetin atqarady. Barlyǵy kompıýterlendirilgen, robottandyrylǵan qural-jabdyqtarmen qamtamasyz etilgen. Balany dıagnozyna saı damytýǵa, ońaltýǵa qolaıly jaǵdaı jasalǵan. Tirek-qımyl apparatyn, psıhonevrologııa júıesin jetildiretin tehnıkanyń da san túri, eden-qabyrǵasy tutastaı sensorlanǵan ınteraktıv bólmesi, shýngıt bólmeleri, basseın, fızıoterapııa, basqa da bólimderi bar.
Qostanaı oblysy
