Jergilikti Ulttyq balalar densaýlyǵy ınstıtýtynda (National Institute of Child Health) mamandar kópsalaly komanda quryp, egizderdi ajyratýǵa arnalǵan kúrdeli hırýrgııalyq operasııa júrgizgen. Aýrýhana ókilderi bul otany medısınalyq turǵydan úlken jetistik dep baǵalady.
Mundaı jaǵdaıda ár sekýndtyń salmaǵy aýyr. Sebebi jabysyp týǵan egizderdiń aǵzalary bir-birine tym jaqyn ornalasady, keıde júıke júıesi, súıek-býyn, bulshyqet tinderi ortaq bolýy múmkin. Sondyqtan dárigerler otaǵa deıin egjeı-tegjeıli dıagnostıka jasap, qaýip-qaterdi barynsha azaıtýǵa tyrysady.
Medısına qyzmetkerleriniń aıtýynsha, mundaı hırýrgııalyq aralasýlarda eń áýeli nárestelerdiń ómirlik kórsetkishteri turaqty saqtalýy, qan aınalymy, tynys alý júıesi, júıke talshyqtarynyń zaqymdanbaýy jáne operasııadan keıingi qalpyna kelý kezeńiniń durys uıymdastyrylýy sheshýshi ról atqarady.
Egizderdiń ata-anasy dárigerler men medbıkelerge shynaıy rızashylyǵyn bildirip, aq halattylardyń jankeshti eńbegin erekshe atap ótken. Ár ata-ana úshin eń úlken baqyt – perzentiniń amandyǵy. Al kúrdeli dıagnozben týǵan sábılerdiń ómiri úshin arpalysqan sátterde úmittiń sáýlesin jaqqan – dárigerdiń kásibıligi men adamdyq janashyrlyǵy.
Jabysyp týý – medısınada sırek kezdesetin qubylys. Mundaı jaǵdaılar qoǵamǵa bir mezette birneshe oı salady. Birinshiden, qazirgi medısınanyń múmkindigi keńeıgen saıyn ómirdi saqtap qalýdyń joldary kóbeıip keledi; ekinshiden, aýyr taǵdyrǵa tap bolǵan otbasylarǵa moraldyq qoldaý men sapaly medısınalyq qyzmettiń mańyzy arta túsedi; úshinshiden, mundaı operasııalar – bir ǵana dárigerdiń emes, tutas júıeniń, tájirıbeniń jáne komandalyq jumystyń nátıjesi.
