Jerlesterin qýantyp, jaqsylyqqa sep bolǵan qaıyrymdy jandarǵa Aqjaıyq aýdanynyń ákimi Murat Serdalın, aýdandyq máslıhat tóraǵasy Sálimgereı Sırajev, aýdan prokýrory Almas Taspıhov, eńbek ardagerleri bastaǵan halyq ókilderi alǵys aıtty.
– Qoǵam tek ekonomıkalyq kórsetkish, damyǵan ınfraqurylymmen alǵa baspaıdy. Qoǵamdy alǵa jeteleıtin – adamdar arasyndaǵy ózara qoldaý, meıirim men senim. Osyndaı qundylyqtardy kúndelikti ómirde naqty ispen nasıhattap júrgen azamattar – eldigimizdiń shynaıy tiregi. Búgingi marapat – bir adamnyń eńbegine berilgen baǵa ǵana emes, jaqsylyqty dáripteý, jaýapkershilikti arttyrý jolyndaǵy mańyzdy qadam. Qaıda júrse de týǵan aýylynyń órkendeýine úles qosqan azamattar jasaı bersin! – dedi aýdan basshysy Murat Amangeldiuly.
Bıyl Aqjaıyq aýdanynda jerlesterdiń, mektep túlekteriniń muryndyq bolýymen 70 mln teńge jınalyp, túrli deńgeıdegi 19 joba júzege asqan eken. Bul kózge kórinetin, aýyz toltyryp aıtatyn iri ister ǵana.
Jaqsynyń jaqsylyǵyn aıt, nury tasysyn degendeı, olardyń keıbirin aıta keteıik: Kónekketken aýyldyq okrýginiń Qamystykól aýylyndaǵy shaǵyn mektepti 1995 jyly támamdaǵan túlekter ózderi bilim alǵan mektep kitaphanasyna 80 dana jańa kitap syılaǵan. Buǵan qosa synyptastar aýyl kóshelerine jaryq shamdaryn ornatyp, jarqyratyp qoıypty. Al okrýg ortalyǵynyń 2005 jylǵy túlekteri ózderiniń altyn uıasy Oraz Isaev atyndaǵy mekteptiń akt zalyn tolyqtaı jańartyp bergen. Kórshi aýyl Esensaıda osydan 10 jyl mektep bitirgen ul-qyzdar muqtaj janǵa jańa baspana satyp alyp bergen. Jambyl aýylynda 1983 jylǵy túlekter aýyl ishinde memlekettik rámizder alańyn jasaqtap, patrıot jastardyń bas qosatyn múıis paıda bolypty. Aýdan ortalyǵynyń 2000 jylǵy túlekteri «Aýylym – altyn besigim» jaryq dıodty kompozısııasyn ornatsa, shaǵyn ǵana Jańajol aýylynyń 2004-2005 jylǵy túlekteri de osyndaı arhıtektýralyq nysan salyp, aýylǵa kireberis jolǵa eńseli qaqpa ornatqan. Bazartóbeni aýylynyń 2005 jylǵy túlekteri men 1988 jyly týǵan aýyl azamattary týǵan jerdiń ataýyn ádemi eskertkish belgige aınaldyrsa, 2005 jylǵy túlekter Almaly aýylynyń kire beris jolyn samaladaı jarqyratyp bergen. Qabyrshaqty, Ilbishin aýyldaryna kire beristegi sándi arka, Aqsýattaǵy jazǵy sahna, Almaly mektebindegi sýburqaq, Býdarın aýylyndaǵy «Jastar» oıyn alańy da osyndaı uıymshyldyq nátıjesinde paıda bolǵan. Bazarsholandyq bir top azamat 15 mln teńgedeı qarjy jınap, aýylǵa sport keshenin salyp berse, Taıpaqta aýyl turǵyndary men beldi kásipkerler birlesip, jalpy quny 24 mln teńgeden asatyn jazǵy sport alańy men fýtbol alańyn el ıgiligine syıǵa tartqan.
Árıne, bul Aqjaıyqtaǵy atymtaı jomarttar atqarǵan isterdiń tolyq tizimi emes. Eń bastysy, jerlesterine júrek jylýyn syılaǵan jandar eldiń yqylasyna bólendi.
Batys Qazaqstan oblysy
