Konserttik baǵdarlamanyń sáni men saltanatyn asyrýǵa elge tanymal Baqtııar Taılaqbaev, О́ktem Altaev, Tahmına Áshimbekova, Jubanysh Jeksenuly, Marta Tólepbergen, Ashat Tarǵyn, Beıbitgúl Nurymhojına, Dımash Dáýletov, Abık Jeksen, Ǵarıfa Igisinova, Erik Tólenov pen DARO syndy belgili ónerpazdar úlesin qosty.
«Panfılov kóshesindegi jańa jyl» qalalyq festıval úsh metrlik qýyrshaqtar qatysqan «Alma men Ata» atty biregeı kóshelik teatrlandyrylǵan shoýǵa ulasty. Alyp qýyrshaq-qaharmandar akterlermen birge meıirim, jaryq pen adam júreginiń kúshi týraly áserli oqıǵa usyndy. Immersıvti formattaǵy qoıylym anshlagpen ótti.
«Bul biz ómir súrip jatqan qala, adamdar jáne árkim óz qolymen jasaı alatyn shýaq týraly festıval. Biz Almatynyń shynaıy bolmysyn – jyly, ashyq jáne dostyq rýhyn qaıta sezingimiz keldi», deıdi joǵarydaǵy jobanyń prodıýseri Maıra Izmaılova.
Festıval aıasynda jas mýzykanttar baıqaýy uıymdastyrylyp, jas daryndar, jandy daýystar men kórermenderdiń erek kóńil kúıi alańdy shattyqqa bóledi.
Sol sııaqty 27 jeltoqsannan bastap festıval aýmaǵynda «Snow Park» qysqy parki jumysyn bastady. Bul taý shańǵysy men snoýbordtaǵy frıstaıl áýesqoılaryna arnalǵan arnaıy aımaq. «Snow Park» 4 qańtarǵa deıin kún saıyn jumys isteıdi.
Al «Eko-shyrsha Almaty» alleıasy qonaqtardyń erekshe qyzyǵýshylyǵyn týǵyzdy. Qaıta óńdelgen jáne ekinshi rettik materıaldardan jasalǵan art-shyrshalar kórmesine open-call arqyly 30-dan astam ótinim túsip, fınalǵa 15 joba ótti. Ár fınalıske ıdeıasyn júzege asyrý úshin 100 myń teńge kóleminde grant berildi.
«Igi isteri kıiz úıi» qaıyrymdylyq aksııasy festıvaldyń áleýmettik ózegine aınaldy. Qonaqtar qoldaýǵa muqtaj balalar men eresekterdiń armany jazylǵan hattaryn oqyp, tilekterin oryndaýǵa múmkindik aldy.
