Foto: Aqorda
«Turkistan» gazetiniń bas redaktory keıbireýler Prezıdenttiń salmaq tastap, sergek kórine bastaǵanyn, endi bireýler oǵan keraǵar pikir bildirip júrgenine nazar aýdara otyryp, Qasym-Jomart Toqaevtan densaýlyǵy týraly ashyq surady.
«Densaýlyǵym jaqsy, qan qysymym qalypty. Kún saıyn ıogamen shuǵyldanýdy ádetke aınaldyrdym, biraq medıtasııa jasamaımyn. Burynǵy kásipqoı sportshymen aptasyna eki ret ústel tennısin oınaımyn. Rasymen, toǵyz keli salmaq tastap, ózimdi áldeqaıda jaıly sezinetin boldym», dedi Memleket basshysy.
Sondaı-aq Qasym-Jomart Toqaev Baýyrjan Babajanulynyń saýalyna jaýap bere otyryp, TMD elderindegi áriptesteriniń ishinde taǵy kimderdiń sportqa jaqyn ekenin aıtty.
«Taıaýda Bishkekte ótken beıresmı is-shara kezinde Pýtın jas dzıýdoshyǵa qarsy ádemi ádis jasap, aǵa býynnyń abyroıyn kóterip tastady. Álıev te myqty, kánigi sportshy sııaqty únemi jattyǵady, Japarov fýtbol oınaıdy. Mırzııoev te shıraq, ol jattyǵý zalynda shynyǵady. Pashınıan velosıped tebedi. Lýkashenko áli kúnge deıin hokkeı oınaıdy eken. Kezinde teńiz-áskerı kúshterinde bolyp, ábden shynyqqan Rahmonnyń da densaýlyǵy jaqsy. Bir sózben aıtsam, áriptesterimniń bári de babynda», dedi Prezıdent.
Eske salaıyq, búgin Qazaqstan Prezıdenti Qasym-Jomart Toqaev «Turkistan» gazetine keń kólemdi suhbat berdi. Onda ol kólik jáne logıstıka salasyn damytý Qazaqstan úshin strategııalyq mańyzy bar basymdyq ekenin atap ótti. Qasym-Jomart Toqaev Nursultan Nazarbaevtyń Vladımır Pýtınmen kezdesýleri beıresmı sıpatqa ıe ekenin aıtty. Sondaı-aq Prezıdent sońǵy jyldary tarıhty talqylaý sánge aınalǵanyn sóz etti. Túrli podkasttar, fılmder, maqalalar men kitaptar shyǵyp jatqanynan habardar ekenin jetkizdi.
