ASTANA. 24 naýryz. Sońǵy birer kúnniń aınalasynda Ýkraınadaǵy jaǵdaı kúrt ózgerip ketti. Joǵary radanyń depýtaty, Dnepropetrovsk oblysynyń gýbernatory , olıgarh Igor Kolomoıskıı «Ýkrnaftadaǵy» jaǵdaıy teńsele bastaýyna baılanysty bılikke qarsylyq kórsetýge kiristi. Munyń ózi eldiń ońtústik-shyǵysyndaǵy shıelenistiń beti Dnepr ózeniniń boıyna qaraı aýysqanyn kórsetedi. Bul týraly VVS habarlady.
«Dúısenbige qaraǵan túni avtomatpen qarýlanǵan belgisiz bireýler «Ýkrnafta» ǵımaratyna basyp kirip, onyń kireberisindegi baqylaýdy kúsheıtip, joldy jaýyp tastady. Ýkraınanyń buqaralyq aqparat quraldary olardyń «Dnepr-1» batalonynyń jaýyngerleri ekenderin jazyp jatyr», - delingen habarlamada.
Al «Dnepr-1» qaýipsizdik qyzmetiniń bir qurylymy bolýymen birge, gýbernator Kolomoıskııdiń baǵynystylyǵyndaǵy batalon bolyp tabylady.
Alaıda,Ýkraına ishki ister mınıstriniń keńesshisi Zorıan Shkırıak bul málimdemeni joqqa shyǵaryp, ǵımaratty kúzetip turǵan jeke fırmanyń sarbazdary ekenin jetkizdi. Sheneýnik sondaı-aq «deregi anyqtalmaǵan, jalǵan aqparlardy taratýdy toqtatýǵa» shaqyrdy. Ol mılısııa «kúsh qurylymdarynyń teketirese ketpeýin» baqylap tur degendi bildirdi.
Osy aralyqta ýkraın BAQ-tary qarýly kisilerdiń ǵımaratty Igor Kolomoıskııdiń buıryǵy boıynsha basyp alǵandaryn jazyp jatyr. Kolomoısııdiń ózi bolsa, ǵımarattyń aldyna jeksenbi kúni keshke keldi. Ol ǵımaratty jaýyp qoıǵan «Kolomoıskııdiń batalony emes», kompanııanyń kúzetshiler ekenin aıtty. Olıgarhtyń aıtýynsha, reıderlikten osylaı qorǵanýdy jón sanaǵan.
Ýkraınaniń ishki ister mınıstrliginiń ókilderi de «Ýkrnaftanyń» ǵımaratyn «Dnepr-1» batalonynyń jaýyngerleri qorǵap turǵanyn joqqa shyǵardy. Muny mınıstr Arsen Avakovtyń ózi jetkizdi.
Naýryzdyń 19-nda Joǵarǵy rada aksıonerlik qoǵam jónindegi zańǵa shuǵyl ózgerister engizdi. Bul «Ýkrnaftanyń» aksııasynyń basym bóligine ıelik etýshi Igor Kolomoıskııdiń erkin qımyldaýyna tosqaýyl qoıý úshin jasalǵany birden belgili boldy.
Sol kúni «Ýkrnafta» kompanııasynyń baqylaý keńesi Kolomoıskııdiń qoıǵan adamy Aleksandr Lazorkony ornynan bosatyp, onyń ornyna Iýrıı Melnıkti taǵaıyndady. Kompanııa alyp qoıyp, onyń basshysyn qýyp jiberýdi Igor Kolomoıskıı reıderlik dep baǵalady.
Juma kúni prezıdent Petr Poroshenko jýrnalısti beıádep sózderdi qoldaný arqyly qorlaǵan Kolomoıskııge sógis berdi.
Budan keıin Igor Kolomoıskıı men onyń komandasy 25 naýryz, sársenbi kúni ózderin qorǵaıtyn jurtty jınaý arqyly Dnepropetrovskide «halyq jıynyn» («narodnoe veche») ótkizýge sheshim qabyldady.
Sońǵy sátte buqaralyq aqparat quraldary gýbernatordyń Dnepropetrovskige tartyp ketkenin baıandady.
Murat Aıtqoja.
