Halqynyń júreginen oryn alǵan, eliniń bolashaǵy úshin aıanbaı qyzmet etken birtýar tulǵaǵa taǵzym etý sharasyna Almaty qalasy máslıhatynyń tóraǵasy Meıirjan Otynshıev, Almaty qalalyq Mádenıet basqarmasynyń basshysy Danııar Alıev, Halyqaralyq D. Qonaev qorynyń prezıdenti Eldar Qonaev, M.Áýezov mýzeıiniń dırektory Dııar Qonaev, Dinmuhamed Ahmetulynyń qyzmettesteri men týǵan-týystary, memleket jáne qoǵam qaıratkerleri, joǵary oqý oryndarynyń stýdentteri, sondaı-aq qala turǵyndary men qonaqtary qatysty.
Is-shara barysynda sóz alǵan Eldar Asqaruly: «Búgin Dinmuhamed Ahmetuly Qonaevtyń týǵanyna 114 jyl tolyp otyr. Ol – elimizdiń damýy men qalyptasýyna ólsheýsiz úles qosqan tarıhı tulǵa. Onyń eren eńbegi men memleketshil bolmysy Qazaqstan tarıhynda aıryqsha oryn alady», dedi.
Sondaı-aq is-shara aıasynda RMK «Ǵylym ordasy» akademııasy atynan Dinmuhamed Ahmetuly Qonaevqa qatysty barlyq resmı qujattar D.A.Qonaev mýzeıiniń qoryna tabystaldy. Bul qundy mura uly tulǵanyń saıası, ǵylymı jáne qoǵamdyq qyzmetin tereńirek zerdeleýge múmkindik beredi.
Sonymen qatar, is-sharaǵa jınalǵan qonaqtar úshin D.A.Qonaev mýzeıi men memorıaldy páter-mýzeıinde arnaıy ekskýrsııalar uıymdastyrylyp, mýzeı qyzmetkerleri Dinmuhamed Ahmetulynyń ómir joly, el basqarýdaǵy kemeńgerligi men adamgershilik bolmysy týraly tyń derektermen bólisti.
