Foto: Ashyq derekkózden
Shymkent qalalyq polısııa departamenti Nuraıǵa birneshe ret pyshaq jaraqatyn salyp, oqıǵa ornynan qashyp ketken kúdiktini qolǵa túsirdi. Polısııa málimetinshe, kúdiktiniń aty-jóni – Aımahan Sherhan.
Serikbaı Sultan kúdikti qaryndasynyń jýastyǵyn paıdalanyp, ábden basynǵanyn, «joq» degen sózin elemeı, stalkıng jasaǵany týraly jazdy.
«Shynymyzdy aıtsaq qan jylap otyrmyz. Biz ár jańalyqty oqyp otyramyz, qoldaý kórsetip jatqan jandarǵa rahmetimizdi aıtamyz. Qazir bizdiń qoldan tek oǵan («adamǵa» degen sózdi aıtýǵa qımaı otyrmyn) maksımaldy merzim berýdi suraý ǵana keledi. Qysqasha aıtqanda meniń qaryndasym eń aqyldy, sabyrly, tuıyq, jýas qyz bolǵandyqtan barynsha basynǵan. «Joq» degen sózdi túsinbegen. Stalker bolǵan», dep jazdy marqumnyń aǵasy.
Endi Nuraıdyń otbasy qoldaý surap otyr.
«Bul oqıǵany búkil jerge taratyp, bizdi qoldaýlaryńyzdy suranamyz (ádil sheshim shyǵarýǵa). Qazir bizge artyq sóz sóıleýge, jazýǵa bolmaıdy óıtkeni keıin arǵy jaqtyń advokattary tyrnaq astynan kir izdeıdi. «Sot prosesi» ádil ótedi degen senim bar. Bárimizge sabyr men júrek tynyshtyǵyn bersin», dedi Serikbaı Sultan.
Qaıǵyly oqıǵaǵa qatysty Nuraıdyń Aıym esimdi qurbysy da únsiz qalmady. Qurbysynyń aıtýynsha, Aımahan Sherhan marqumǵa «Meni temir torǵa otyrǵyza almaısyń» dep ses kórsetken.
Aıym threads jelisindegi paraqshasynda marqum men kúdikti toıda tanysqanyn, sol ýaqyttan keıin Aımahan Sherhan qurbysynyń sońynan qalmaı, aqyrynda qyz ben otbasynyń aıqyn qarsylyǵyna qaramastan Almatydan Shymkentke alyp qashqanyn jetkizdi.
«Qyzdy qylmyskerdiń úıinen týystary alyp ketkenimen, osy oqıǵadan keıin Nuraıdyń ómiri tozaqqa aınaldy. Aımahan Sherhan uzaq ýaqyt boıy stalkıngpen aınalysqan. Nuraı ony buǵattaǵan kezde, onyń qurbylaryna jazǵan. Qurbylaryn qaıta-qaıta mazalap habarlasyp, áleýmettik jelidegi paraqshalary arqyly Nuraıdyń ár qadamyn ańdyǵan. Nuraı bul árekettiń barlyǵyn skrınshottap, dálel retinde jınaǵan. Alaıda polısııaǵa aryz jazǵan kezde onyń aryzy tıisti túrde qarastyrylmaǵan», dep jazdy Aıym.
Ol bul qandy oqıǵany bir adamnyń emes, qoǵamnyń tragedııasy dep baǵalap, quzyrly organdardan ádildik talap etip otyr.
