Tanystyrylym barysynda mýzeı zaldaryna ekskýrsııa júrgizildi. Jańalanǵan mýzeı ekspozısııalaryna arhıvtik derekter, oblystyq mýzeı qoryndaǵy qujattar, fotosýretter men tarıhı, mádenı, arheologııalyq eksponattar qosylyp, jalpy mýzeı zaldary 60 paıyz jańa eksponattarmen tolyqty. Jóndeý jumystary aıasynda mýzeı ǵımaratynyń qasbeti jańartyldy, aýmaǵy abattandyryldy. Jasandy ıntellekt tehnologııasynyń kómegimen jańa ekspozısııalyq zaldar zamanaýı talaptarǵa saı qaıta jabdyqtaldy. Mýzeıdiń konferens-zaly da zamanaýı úlgide qaıta jabdyqtaldy.
«Dáýirler toǵysyndaǵy Ulytaý» dep atalatyn birinshi zalda Ulytaý oblysy óńiriniń tarıhı, tabıǵı damý kezeńderinen bastap túrli mádenıetke deıingi ekspozısııalardy qamtıdy. Paleontologııa bóliminde Alyp múıiztumsyqtyń rekonstrýksııasy, jerasty peshtiń mıltımedııalyq dıoramasy kórsetilgen. Ekinshi zal – «Ulytaý ǵasyrlar shejiresi». Ol Ulytaýdyń dala órkenıeti men qazaq memleketiniń tarıhı ózegi bolǵandyǵyn aıǵaqtaıtyn ekspozısııadan quralǵan. Talmas ata kesenesinen tabylǵan er adamnyń gıperrealıstik músini, «Bulanty shaıqasy» mýltımedııalyq dıoramasy qoıylǵan. Bul zalda saqtar kezeńinen HIX ǵasyrdyń arheologııalyq qundy jádigerlermen tarıhı sabaqtastyq kórsetilgen. Úshinshi zalǵa XX ǵasyrdaǵy qoǵamdyq − saıası tarıh arqaý bolǵan. Alash zııalylary, Steplag, Ekinshi dúnıejúzilik soǵys, aýylsharýashylyqtyń damýy kórsetilgen.
Tórtinshi «Qazynaly ólke tarıhy» zaly. О́lke óndirisiniń damýy, alǵashqy geologtar, Q.Sátbaevtyń gologrammasy, Jezqazǵan qalasynyń tarıhy, Ǵarysh aılaǵy, Chernobyl, Aýǵan soǵysy, Tájik-aýǵan shekarasyndaǵy urys qımyldaryna qatysqan jaýyngerlerdiń erlik tarıhy, Jeltoqsan oqıǵasy, «20-shy oblystyń 20 eleýli oqıǵasy» konsepsııasy negizinde Ulytaý oblysynyń jetistikteri, halyqaralyq festıvalderi, rekordqa engen jergilikti azamattar týraly fotosýretter men eksponattar arqyly berilgen. Memleket basshysynyń Ulytaý oblysynda týrızm klasterin damytý maqsatynda oblys boıynsha toǵyz týrıstik marshrýt týroperatorlar kórsetilgen týrıstik kartamen aıaqtalady.
«Oblysymyzdaǵy 48 jyl tarıhy bar mýzeıdiń jańa zamanǵa saı jańartylýy úlken qýanysh. 27 jasymda mýzeıge ekskýrsııa júrgizýshi bolyp kelip, 20 jylǵa jýyq taban aýdarmaı ǵylymı qyzmetkerden mýzeı basshysyna deıingi qyzmet atqardym. Sondyqtan mýzeıdiń árbir qyzmetkeri men eksponaty men úshin ystyq. Búgingi jańǵyrtylǵan mýzeıdi aralaý barysynda maǵan mýzeı zaldarynyń keńeıip, jádigerler saqtaıtyn qor saqtaý qoımasynyń jańartylýy, ekspozısııa zaldarynyń taqyryptyq tujyrymdamasynda oblystyń tarıhy jan-jaqty qamtylýy, mýzeı qoryndaǵy jádigerlerge jan bitirip, utymdy paıdalanýy unady. Bilikti basshy Zaǵıra Qalmenova bastaǵan mýzeılik áriptesterimniń atqarǵan orasan zor eńbegine alǵys bildiremin», deıdi Jezqazǵan qalalyq máslıhatynyń tóraǵasy Raýshan Qaparova.
Ulytaý oblysynyń ákimi Dastan Adaıuly mýzeı ujymyna kóshpeli is-sharalardy ótkizýge zor múmkindik beretin gazel avtokóliginiń kiltin saltanatty túrde tabys etti.
Aıta keteıik, búgin Ulttyq quryltaıda Prezıdent eki jyldyń ishinde elimizde 100-den astam mádenıet oshaǵy jóndeletinin aıtty.
