Abaı teatrynyń Sıngapýrdegi gastroli – mádenıetter toǵysyndaǵy mańyzdy oqıǵa. Bul shyǵarmashylyq sapar ǵana emes, Qazaqstan mádenıetiniń álemdik keńistikke nyq enýiniń aıqyn kórinisi. Geografııalyq turǵydan da, mádenı jaǵynan da alys sanalatyn Sıngapýr sahnasynda óner kórsetý – Abaı teatry úshin jańa kórermen, tyń talǵam hám aıshyqty mádenı dıalog degen sóz. Al Ońtústik-Shyǵys Azııadaǵy eń bedeldi mádenı ári bilim ortalyqtarynyń biri NUS alańynda qazaq baletiniń usynylýy ulttyq ónerdiń halyqaralyq deńgeıde suranysqa ıe ekenin ańǵartady.
Gastroldik baǵdarlamanyń mazmuny baı, kórkemdik sheshimi jaǵynan salmaqty. Teatr sıngapýrlyq kórermenge eki túrli baǵyttaǵy qoıylymdy usynyp, klassıkalyq balet pen zamanaýı horeografııanyń úzdik úlgilerin toǵystyrdy.
Atap aıtsaq, alǵashqy baǵdarlama — «Klassıkalyq balet jaýharlary» atty gala-kesh. О́ner merekesi álemdik balet óneriniń altyn qoryna engen tańdaýly shyǵarmalardan quralǵan. Petr Chaıkovskııdiń «Aqqý kólinen» oryndalǵan adajıo – tazalyq pen mahabbattyń rámizine aınalǵan máńgilik lırıka bolsa, romantıkalyq balettiń shyńy sanalatyn «Sılfıda» qoıylymy arqyly kórermen názik sezim men qııalǵa toly poetıkalyq álemge endi. Al «Don Kıhot» baletinen usynylǵan úzindiler sahnaǵa shattyq pen jarqyn áser syılap, klassıkalyq balettiń temperamentke toly qyryn áıgiledi.
Aıtýly gala-kesh – tek ásem bı ǵana emes, oryndaýshylardyń kásibı deńgeıin, sahnalyq mádenıetin, qazaq balet mektebiniń qalyptasqan dástúrin aıqyn kórsetken kórkem qoıylym. Árbir qımyl men plastıkalyq sheshim arqyly ulttyq sahnanyń joǵary talǵamy sezildi.
Gastrol aıasyndaǵy ekinshi baǵdarlama – bir aktili «Karmen-sıýıta» baleti. Atalǵan týyndy álemdik horeografııa ónerinde erekshe oryn alady. Qoıylymdy áıgili kýbalyq horeograf Alberto Alonso sahnalap, mýzykasyn HH ǵasyrdyń kórnekti kompozıtory Rodıon Shedrın jazǵan. «Karmen-sıýıta» – klassıkalyq balet kanondaryn buzǵan, jańashyl kórkem tilimen erekshelenetin shyǵarma. Karmen beınesi arqyly sahnada erkindikke umtylǵan rýh, qumarlyq pen taǵdyrdyń taıtalasy, mahabbat pen qurbandyq taqyryptary tereń fılosofııalyq deńgeıde ashyldy. Qoıylymdaǵy ótkir dramatýrgııa, minezdi plastıka, emosııalyq qarqyn kórermendi beıjaı qaldyrmaıdy. Bul balet – tek kórkem týyndy emes, adam bolmysynyń kúrdeli tabıǵatyn sahnalyq tilmen beıneleıtin oıly shyǵarma.
Tarıhy tereń, dástúri berik Abaı atyndaǵy Qazaq ulttyq opera jáne balet teatry búgingi tańda ulttyq mádenıettiń basty tirekteriniń biri sanalady. Onyń Sıngapýr sahnasyndaǵy óneri – qazaq óneriniń álemdik keńistikke batyl qadam basqanynyń aıǵaǵy. Aıtýly gastrol ulttyq mádenıetimizdiń mártebesin kóterip qana qoımaı, elimizdi klassıkalyq óner kartasynda aıqyn tanyta tústi.
