B. Meıirbaevtyń aıtýynsha, qazirgi Konstıtýsııada zaıyrlylyq prınsıpi kórsetilgenimen, onyń ashyq emes tustary quqyq qoldanýda túsinbeýshilikter men ekiushtylyqtar týǵyzady. Bul óz kezeginde dindi saıasılandyrý qaýpin arttyrady. Al usynylǵan ózgeris mundaı qaterlerdi joıýǵa múmkindik beredi.
«Din men memlekettiń araqatynasyn tikeleı normamen bekitý arqyly biz memlekettik bıliktiń beıtaraptyǵyn qamtamasyz etemiz. Bul ártúrli din ókilderine, ateısterge jáne basqa senim ustanýshylarǵa teń kózqarasty ornatady, ar-ojdan bostandyǵyn shektemeı, kerisinshe ony nyǵaıtady. Mysaly, qoǵamdyq pikirtalas kezinde kóterilgendeı, bul ózgeris ekstremızm men radıkalızmniń aldyn alýǵa da septigin tıgizedi. Memleket din máselelerinen aýlaq turyp, azamattardyń quqyqtaryn birdeı qorǵaıtyn bolady», dedi B. Meıirbaev.
Onyń aıtýynsha, halyqaralyq tájirıbe bul usynystyń tıimdiligin dáleldeıdi.
«Belgili zańger Serik Aqylbaı atap ótkendeı, Germanııanyń Konstıtýsııasynda memlekettiń dinge beıtaraptyǵy naqty jazylǵan: memleket eshbir dindi resmı túrde qoldamaıdy, biraq din bostandyǵyn qorǵaıdy. Bul Germanııadaǵy ártúrli konfessııalardyń beıbit qatar ómir súrýine jaǵdaı jasaǵan. Túrkııanyń Konstıtýsııasynda da zaıyrlylyq qaǵıdaty memlekettiń negizgi prınsıpi retinde bekitilgen, bul dinniń saıası júıege aralasýyn boldyrmaı, qoǵamdyq turaqtylyqty saqtaıdy. Qyrǵyzstannyń Ata zańynda da dinniń memleketten bólektigi tikeleı kórsetilgen, bul Ortalyq Azııadaǵy kórshimizdiń demokratııalyq reformalaryndaǵy mańyzdy qadamy boldy jáne adam quqyqtarynyń halyqaralyq standarttaryna sáıkestendirýge kómektesti», dedi ol.
Bekjan Meıirbaev bul usynysty qoldaý Qazaqstannyń zaıyrly memleket retindegi ımıdjin kúsheıtetinin jáne halyqaralyq qoǵamdastyqtaǵy bedelin arttyratynyn atap ótti. Jalpy alǵanda, bul usynys Konstıtýsııalyq komıssııa jumysynyń mánin arttyryp, reformalardyń sapasyn kóteredi dep esepteıtinin jetkizdi.
Konstıtýsııalyq komıssııa: Qazaqstan aýmaǵynyń tutastyǵy týraly norma ózgerissiz qalady
