Foto: Aqorda
Darhan Satybaldynyń aıtýynsha, byltyr qysqa merzimdi ekonomıkalyq ındıkator 12,8 paıyzǵa kóterilgen. Memleket bıýdjetine 6,6 trıllıon teńge salyq pen mindetti tólemder túsken.
Prezıdentke qalanyń birneshe ortalyǵyn damytýǵa baǵyttalǵan jańa strategııalyq bastamalar tanystyryldy. Atalǵan tujyrymdama aıasynda zamanaýı IT-ınfraqurylym, kópfýnksıonaldy iskerlik keshender, sondaı-aq turǵyndardyń demalysy úshin abattandyrylǵan rekreasııalyq aımaqtar jasaqtalady. Iаǵnı bul jurtshylyq jıi baratyn oryndarǵa aınalady.
Qasym-Jomart Toqaevqa Almaty qalasynyń zamanaýı kólik júıesin qalyptastyrý jóninde málimet berildi. Júrdek qoǵamdyq kólik júıelerin damytý turǵyndardyń júrip-turýyna qolaıly jaǵdaı jasap, qalany ornyqty damytýdyń negizgi faktory bolmaq.
Qala ákiminiń aıtýynsha, Almatynyń Bas josparynda aýanyń erkin aınalymyn qamtamasyz etýdi, shahardyń joǵary jáne ortalyq bólikterindegi shamadan tys tyǵyz qurylysty tejeýdi, sondaı-aq jasyl jelektiń aýmaǵyn úsh esege – 3 800 gektarǵa deıin ulǵaıtýdy kózdeıtin sheshimder qarastyrylǵan
Memleket basshysyna 2025 jyly qala kósheleri sapaly jaryqtandyrylyp, qýaty eki ese artqany jóninde aıtyldy. Budan bólek, qalany abattandyrý, kógaldandyrý, qoǵamdyq keńistikterdi bezendirýdiń biryńǵaı standartyna sáıkes saıabaqtar men kóshelerdi jańǵyrtý sharalary josparlanǵan.
Sonymen qatar Prezıdent Almaty taý klasteri jobasyn daıyndaý jaıyndaǵy esepti tyńdady. Qazirgi kezde «Medeý» bazalyq stansııasy arqyly «Shymbulaq» jáne «Oı-Qaraǵaı» kýrorttaryn biriktirýdi kózdeıtin tehnıkalyq-ekonomıkalyq negizdemeni ázirleý jumystary aıaqtalyp qaldy. Atalǵan jobany júzege asyrý nátıjesinde aspaly joldardyń sany 16-dan 62-ge deıin kóbeıedi, taý shańǵysy trassalary 250 shaqyrymnan asa uzarady, al demalys aımaqtary táýligine 40 myń adamǵa deıin qabyldaı alatyn deńgeıge jetedi.
Kezdesý sońynda Memleket basshysy Almaty qalasynyń ekonomıkasyn odan ári ártaraptandyrý, ekologııalyq jaǵdaıyn jaqsartý, qalanyń ornyqty kólik jáne týrıstik ınfraqurylymyn qalyptastyrý, sondaı-aq qala ortasynyń sapasy men turǵyndardyń turmys deńgeıin arttyrý jóninde birqatar tapsyrma berdi.
Aıta keteıik, búgin Prezıdent Joǵarǵy Sot tóraǵasy Aslambek Merǵalıevti qabyldady.
