Sýret: nur.kz
Chempıondar lıgasynyń jalpy kezeńindegi segizinshi oıynyn Londonda ótkizgen almatylyq klýb jergilikti «Arsenal» komandasynan 3:2 esebimen utyldy. Tóreshiniń ysqyryǵynan keıin alǵa umtylǵan londondyqtar 2-mınýtta-aq esep ashty. Vıktor Dıokeresh enshisine gol jazdy. 7-mınýtta Jorjıno penaltıden tarazy basyn teńestirdi. Kaı Havers 15-mınýtta «Arsenaldy» alǵa shyǵarsa, 36-mınýtta Gabrıel Martınellı esepti 3:1-ge
jetkizdi.
Rafael Ýrazbahtın baptaıtyn «Qaırat» oıynshylary ekinshi taımda qansha tyrysqanymen tegeýrindi qarsylastyń qorǵanysyn buza almady. Tek 90+4-mınýtta Rıkardo Vıana Fılo esepti qysqartty. «Arsenal» klýby chempıondar lıgasynyń jalpy kezeńinde ótkizgen 8 matchta óz qaqpasyna 4 gol ǵana jiberdi, sonyń ekeýin «Qaırat» fýtbolshylary soqty. Anglııa premer-lıgasynda da, chempıondar lıgasynyń jalpy kezeńinde de kósh bastap turǵan «Arsenaldyń» aıbynynan yqpaǵan almatylyq klýb fýtbolshylary baryn salǵanymen, upaı oljalaı almady.
Osylaısha «Qaırat» fýtbol klýby jetpis jyldyq jylnamasynda chempıondar lıgasynyń jalpy kezeńine tuńǵysh ret shyǵyp, segiz birdeı serkemen tartysqa tústi. Aldymen Portýgalııanyń «Sportıng» klýbynan 1:4 esebimen utyldy, odan keıin Almatyda Ispanııanyń áıgili «Real Madrıd» klýbyna 0:5 esebimen ese jiberdi. Byltyrǵy maýsymda chempıondar lıgasynyń fınalynda súringen Italııanyń «Inter» komandasynan 2:1 esebimen jeńildi. Kıprlik «Pafos» klýbymen Almatynyń «Ortalyq stadıonynda» teń tarqasty (esep – 0:0), Danııanyń «Kopengagen» klýbynan syrt alańda 3:2 esebimen utyldy. «Astana arena» stadıonynda Grekııanyń «Olımpıakos» klýbyna 0:1, Belgııanyń «Brıýgge» komandasyna 1:4 esebimen ese jiberdi.
