Foto: UfaBizPhoto / Shutterstock
Jábirlenýshiniń aryzyna sáıkes, er adam bir jarym jyldan astam ýaqyt boıy áıeldi úzdiksiz ańdyp, onyń nazaryn ózine zorlyqpen aýdarýǵa tyrysqan. Áıeldiń aıtýynsha, ol onyń sońynan erip, ózine jáne aınalasyndaǵy adamdarǵa qatysty janjal shyǵarǵan.
Soltústik Qazaqstan oblysy Polısııa departamentiniń baspasóz qyzmetiniń málimetinshe, kúdikti buǵan deıin jábirlenýshige qatysty balaǵat sózder aıtý, dene jaraqatyn salý, sondaı-aq onyń tanysyna shabýyl jasaý derekteri boıynsha ákimshilik jáne qylmystyq jaýapkershilikke tartylǵan. Soǵan qaramastan, ol qýdalaýyn toqtatpaǵan.
Jábirlenýshi áıel tynyshtyǵynan aıyrylyp, qala ishinde júrýden qorqyp, óz qaýipsizdigine ǵana emes, aınalasyndaǵy adamdardyń da ómirine alańdaǵanyn aıtqan.
2025 jyldyń qyrkúıeginen bastap Qazaqstannyń Qylmystyq kodeksine 115-1-baby «Stalkıng» engizilgennen keıin aıyptalýshy jábirlenýshimen baılanys ornatýǵa eki ret áreket jasaǵan. Sol áreketterdiń biri áıel podezge ornatqan beınebaqylaý kamerasyna túsip qalǵan.
22 qańtarda áıel polısııaǵa júgingen. Tekserý júrgizilgen soń is materıaldary sotqa joldandy. 28 qańtarda sot aıyptalýshyǵa 100 saǵat qoǵamdyq jumys jazasyn taǵaıyndady.
Atyraý oblysynda stalkıng baby boıynsha alǵashqy úkim shyqty
Sonymen qatar oǵan ishimdik ishýge tyıym salyndy. Polısııaǵa profılaktıkalyq áńgimeler úshin turaqty túrde kelip turý mindetteldi.
Úkim ázirge zańdy kúshine engen joq.
