Foto: Sanıtarııalyq-epıdemıologııalyq baqylaý komıteti
Jattyǵý jıynyna qatysqan uıymdar
Oqý-jattyǵýǵa sanıtarııalyq-epıdemıologııalyq qyzmet, jedel medısınalyq járdem, ınfeksııalyq stasıonar mamandary, Ulttyq qaýipsizdik komıtetiniń Shekara qyzmeti, keden jáne polısııa ókilderi, sondaı-aq áýejaı ákimshiligi tartyldy. Bul – memlekettik shekara arqyly ótetin jolaýshylar leginde bıologııalyq qaýiptiń aldyn alýǵa jaýapty barlyq qurylymdardyń birlesken is-qımylyn úılestirýge baǵyttalǵan shara.
Shartty naýqas jáne naqty algorıtm
Oqý-jattyǵýdaǵy ssenarıı boıynsha áýejaıda Nıpah vırýsyna kúdik týdyratyn jolaýshy anyqtaldy. Qyzmetter bastapqy sanıtarııalyq-karantındik baqylaýdan bastap, jolaýshyny oqshaýlaý, medısınalyq tekserý, ınfeksııalyq stasıonarǵa jetkizý, epıdemııaǵa qarsy jáne dezınfeksııalyq sharalardy júrgizýge deıingi barlyq kezeńdi naqty algorıtmge saı oryndady.
Oqý barysynda árbir qyzmettiń jaýapkershilik aımaǵy, aqparat almasý tetikteri jáne jedel áreket etý ýaqyty pysyqtaldy. Mamandardyń úılesimdi jumysy qaýipti ınfeksııalardyń el aýmaǵyna taralý qaýpin barynsha azaıtýǵa múmkindik beretini atap ótildi.
Jańa qaýipti vırýs: Úndistannan kelgen adamdar erekshe baqylaýda bolady
Úılesim men jaýapkershilik
Oqý-jattyǵý qorytyndysy vedomstvoaralyq ózara is-qımyldyń joǵary deńgeıde uıymdastyrylǵanyn kórsetti. Qoldanystaǵy is-qımyl algorıtmderi áleýetti bıologııalyq qaterlerge jedel den qoıýǵa jetkilikti ekeni rastaldy. Is-shara sońynda ótken jumys keńesinde atqarylǵan jumystar taldanyp, ózara yqpaldastyqty odan ári kúsheıtýge baǵyttalǵan usynymdar ázirlendi.
Mundaı oqý-jattyǵýlar memlekettik shekaranyń sanıtarııalyq qorǵaý júıesiniń mańyzdy bóligi sanalady. Olar eldiń sanıtarııalyq-epıdemıologııalyq qaýipsizdigin qamtamasyz etýge, halyq densaýlyǵyn qorǵaýǵa baǵyttalǵan.
2025 jyly sanıtarııalyq-karantındik baqylaýdan 7,2 mıllıon jolaýshy ótken. Onyń ishinde 86 adamnan epıdemıologııalyq qaýiptiliktiń joǵary belgileri anyqtalyp, barlyǵy medısınalyq tekserýden ótkizilgen. Asa qaýipti juqpaly aýrýlar tirkelgen joq.
