Bastamany iske asyrý 2024 jylǵy 1 qańtardan bastaldy. Baǵdarlamaǵa 2006 jyldan bastap týǵan Qazaqstan Respýblıkasy azamattarynyń barlyq balalary qatysady. Baǵdarlama iske qosylǵan kezeńde 6 919 131 balany qamtıdy. 2024 jyly 304 815 qatysýshy jınaqtalǵan qarajatty paıdalaný quqyǵyna ıe bolatyn jasqa jetti. Qarajatty esepteý barlyq qatysýshylar úshin teń sharttar aıasynda júzege asyrylady jáne turǵylyqty óńirine, otbasynyń tabys deńgeıine nemese ata-anasynyń áleýmettik mártebesine baılanysty emes.
Ulttyq qordan beriletin tólemder: Balalardyń shotyndaǵy qorytyndy soma 370 dollardy qurady
Qarjylyq tetik Ulttyq qordyń ınvestısııalyq kirisiniń 50 paıyzyn jyl saıyn balalardyń arnaıy maqsatty jınaqtaý shottaryna baǵyttaýdy kózdeıdi. Qarajat Biryńǵaı jınaqtaýshy zeınetaqy qoryndaǵy jeke shottarda jınaqtalyp, paıdalanýǵa deıin ınvestısııalanady. Baǵdarlama qarajatyn azamat 18 jasqa tolǵanǵa deıin alý múmkin emes. Esepteýlerdiń kózi munaıdan, gazdan jáne eldiń ózge de strategııalyq resýrstarynan túsetin túsimder esebinen qalyptastyrylatyn ınvestısııalyq tabys.
2024 jyly árbir balaǵa 100,52 dollardan esepteldi. 2025 jyly eseptelgen soma 129,38 dollardy qurady.
Memleket basshysynyń bastamasymen bolashaq urpaqtyń tabysy jyl saıyn artyp keledi
Maqsatty jınaqtardy paıdalaný kámelet jasyna tolǵannan keıin eki baǵyt boıynsha júzege asyrylady. Qarajat turǵyn úı jaǵdaılaryn jaqsartýǵa nemese Qazaqstandaǵy jáne sheteldegi bilim berý uıymdarynda oqý aqysyn tóleýge baǵyttalýy múmkin. Qarajatty tolyq kólemde de, ishinara da paıdalanýǵa jol beriledi. Paıdalanylmaǵan qaldyq maqsatty jınaqtaý shotynda saqtalady.
Qarajatty alý rásimi ýákiletti operatorlar arqyly júrgiziledi. Qarajat operatorǵa aýdarylyp, odan ári qatań túrde málimdengen maqsatyna sáıkes qarajatty alýshynyń bank shotyna aýdarylady. Maqsatty rastamaı tikeleı qarajat alý kózdelmegen.
2026 jylǵy 1 qańtardaǵy jaǵdaı boıynsha maqsatty jınaqtardy paıdalaný týraly 205 505 ótinish oryndaldy. Aýdarylǵan qarajattyń jalpy kólemi 31,61 mln dollardan asty. Onyń ishinde 127 445 ótinish boıynsha 19,69 mln dollar turǵyn úı jaǵdaılaryn jaqsartýǵa, 78 060 ótinish boıynsha 11,92 mln dollar bilim alý aqysyn tóleýge baǵyttaldy.
2026 jylǵy qańtar aıyndaǵy jaǵdaı boıynsha 6 918 656 balaǵa kezekti esepteý júrgizildi. Bir balaǵa 130,7 dollar mólsherinde tıesili. Nátıjesinde baǵdarlamaǵa úshinshi jyl qatarynan qatysyp otyrǵan balaǵa eseptelgen qarajattyń jalpy somasy ınvestısııalyq kiristi qosa alǵanda 370 dollar 56 sentti qurady. 2026 jyly 356 613 Qazaqstan azamaty 18 jasqa tolyp, óz maqsatty jınaqtaryn paıdalaný quqyǵyna ıe bolady.
Eseptelgen qarajat týraly aqparat ata-analar úshin egov.kz portaly jáne kids.enpf.kz saıty arqyly sıfrly formatta qoljetimdi. 18 jasqa tolǵan azamattar Biryńǵaı jınaqtaýshy zeınetaqy qory men elektrondy úkimettiń servısteri arqyly óz derekterine derbes qol jetkize alady.
