Saltanatty is-shara qazaq ádebıetiniń búgingi tynysyn tanytyp qana qoımaı, rýhanı jańǵyrý men konstıtýsııalyq reformalar aıasyndaǵy mádenı saıasattyń mańyzyn aıqyndaǵan mańyzdy jıynǵa aınaldy. Marapattaý rásimine Premer-mınıstrdiń orynbasary – Mádenıet jáne aqparat mınıstri Aıda Balaeva, Parlament depýtattary, Qazaqstan Jazýshylar odaǵynyń tóraǵasy Mereke Qulkenov, sondaı-aq zııaly qaýym ókilderi qatysty.
Jeńimpazdardy quttyqtaǵan Aıda Balaeva qalamgerlerdiń ulttyq ádebıetti damytýǵa qosqan úlesin erekshe atap ótip, qoǵamdyq sanany jańǵyrtý kezeńinde ádebıettiń atqaratyn róline toqtaldy. Onyń aıtýynsha, Memleket basshysynyń tapsyrmasyna sáıkes elimizde aqyn-jazýshylardy qoldaýǵa baǵyttalǵan júıeli memlekettik saıasat júzege asyrylyp keledi.
«Memleket basshysynyń ádildik pen birtutastyqqa, zań men tártipke negizdelgen aýqymdy reformalary el damýynyń jańa baǵdaryna aınalyp otyr. Konstıtýsııalyq reformalar – tek quqyqtyq ózgeris emes, eldiń bolashaǵyn aıqyndaıtyn, qoǵamdyq sanany jańǵyrtatyn túbegeıli betburys», dedi Aıda Balaeva. Onyń sózinshe, tarıhı murany saqtaý men tól mádenıetti qoldaý – barshaǵa ortaq mindet. Bul ustanym alǵash ret Konstıtýsııa jobasynda naqty kórinis taýyp, mádenıet pen rýhanııat memleket damýynyń mańyzdy tirekteriniń biri retinde aıqyndalǵan.
Sondaı-aq jańa Konstıtýsııada bilim men ǵylymǵa, mádenıet pen ınnovasııalyq damýǵa basymdyq berilýi eldiń strategııalyq baǵytyn kórsetetin mańyzdy qadam ekeni atap ótildi. Bul – adam áleýetin damytýǵa, shyǵarmashylyq oı men jańa tehnologııalardy qoldaýǵa baǵyttalǵan tańdaý. Osyndaı jaýapty kezeńde qoǵamnyń rýhanı baǵdaryn aıqyndaýda qalamgerler qaýymynyń orny aıryqsha.
Aıta keterligi, bıyl Prezıdenttik arnaýly ádebı syılyqqa «Proza», «Poezııa», «Dramatýrgııa» jáne «Balalar ádebıeti» atalymdary boıynsha 49 jas avtor qatysyp, Memleket basshysynyń Jarlyǵymen jeńimpazdar anyqtaldy. Atap aıtqanda, «Proza» atalymy boıynsha Arman Álmenbet «Tergeýshi» shyǵarmasy úshin, «Poezııa» atalymy boıynsha Saıan Esjan «Qumdaǵy hıkaıa» jınaǵy úshin, «Dramatýrgııa» atalymy boıynsha Baýyrjan Mustafıev «Aq kıiz» týyndysy úshin, al «Balalar ádebıeti» atalymy boıynsha Asylan Tilegenov «Jazda atamnyń aýylynda…» shyǵarmasy úshin marapattaldy.
Keıingi jyldary «Aıboz» ulttyq ádebı syılyǵy rýhanı ortaǵa erekshe serpilis berip keledi. Bıyl baıqaýǵa jeti atalym boıynsha 180-ge jýyq ótinim kelip tústi. Qazylar alqasy shyǵarmalardyń avtoryn bilmeı, ádil ári jasyryn daýys berý arqyly úzdikterdi anyqtaǵan.
О́tken jylǵy «Aıboz» ulttyq ádebı syılyǵynyń jeńimpazdary retinde «Úzdik poezııa» – Hamıt Esamannyń «Aısha bıbi» shyǵarmasyna, «Úzdik proza» jazýshy Dáýren Qýattyń «Brýklın kópirindegi kezdesý» atty týyndysyna, «Úzdik dramatýrgııa» Ádilbek Ybyraıymulynyń «Kenesary han» atty eńbegine, «Úzdik ádebı aýdarma» Ásem Erejeqyzynyń «Kún qarmaǵan bala» atty aýdarmasyna, «Úzdik balalar ádebıeti» «Egemen Qazaqstan» gazetiniń tilshisi Qanat Ábilqaıyrdyń «Altyn bala» shyǵarmasyna, «Úzdik ádebı syn» boıynsha Amangeldi Keńshilikulynyń «Muqaǵalı men Enhe. Aqyn men adamnyń dramasy» atty syn-zertteý maqalasyna, al «Úzdik komıks» janry boıynsha Ildar Sansyzbaıulynyń «Tabý. Joǵalǵan úmittiń izi» atty týyndysyna berildi.
Marapattaý rásiminde sóılegen Aıda Balaeva «Aıboz» ulttyq ádebı syılyǵy jańa esimderdi tanytýǵa, shyǵarmashylyq erkindikti qoldaýǵa jáne sóz óneriniń qoǵamdyq mańyzyn arttyrýǵa baǵyttalǵan mańyzdy joba ekenin atap ótti. Ulttyq ádebıettiń damýyna serpin beretin bul baıqaýlar – rýhanı saıasattyń naqty nátıjesi. Ádebıetke kórsetilgen qurmet – ulttyń bolashaǵyna jasalǵan ınvestısııa ekeni taǵy bir márte aıqyndaldy.
