Medısınalyq jabdyqtardy syıǵa tartty

Bolat О́temuratovtyń «Asyl mıras» qaıyrymdylyq qory Almatydaǵy Akýsherlik, gınekologııa jáne perınatologııa ortalyǵyna quny 18 100 000 teńge turatyn joǵary sapaly medısınalyq kómek kórsetýge jáne shala týylǵan sábılerdi kútýge arnalǵan qajetti jabdyqtardyń jıyntyǵyn syıǵa tartty. Atalmysh ortalyq Qazaqstandaǵy birden-bir akýsherlik-gınekologııa jáne perınataldyq qyzmetti úılestirýmen, ǵylymı-zertteýmen, emdeýmen aınalysatyn jetekshi klınıka bolyp tabylady. Iаǵnı, onda eń aýyr jaǵdaıda bosanatyn áıelderge járdem kórsetýmen qatar, shala týylǵan sábılerdi kútedi. Ortalyq dırektory, medısına ǵylymdarynyń doktory, professor Talǵat Qudaıbergenovtiń aıtýynsha, munda Qazaqstannyń barlyq aımaqtarynan kúrdeli aýrýlarmen túsetin júkti, bosanatyn áıelderge joǵary dárejedegi mamandandyrylǵan kómek kórsetiledi. – Jyl saıyn ortalyqta 7 myńnan asa naýqas kómek alsa, onyń ishinde joǵary deńgeıdegi qaýipti topqa jatatyn analardyń 3000-ǵa jýyǵynyń sábıi bar. «Asyl Mıras» qory kómeginiń arqasynda bizdiń naýqastarǵa táýlik boıy akýsherlik, gınekologııalyq jáne neo­nataldy kómek kórsetýge múmkindik beretin qajetti medısınalyq jabdyqtar men tehnıka satyp alyndy, – dedi ol. Atap aıtqanda, ortalyqqa operasııalyq blokqa ota jasaý ústeli, jańadan týǵan sábılerge arnalǵan tynys berý apparaty jáne jedel járdem kórsetetin medısınalyq kólik satyp alyndy. «Asyl Mıras» qaıyrymdylyq qorynyń dırektory Marat Aıtmaǵambetov ortalyq ujymyna atalmysh jabdyqtardy tapsyra otyryp, aldaǵy ýaqytta bul qurylǵylar dárigerlerdiń aýyr eńbegin jeńildetip, kishkentaı sábılerdiń ómirin saqtap qalýǵa kómegin tıgizetinin jetkizdi. Taǵy bir aıta keterligi, atalmysh qaıyrymdylyq qory men Rixos Borovoe qonaq úıiniń belsendi qoldaý kórsetýimen 2014 jyly qaıyrymdylyq velosherýi uıymdastyrylyp, odan jınalǵan qarjy Aqmola jáne Qyzylorda oblystarynyń perınataldyq ortalyqtaryna tabys etilgen. 2014 jyly negizi qalanǵan qor maqsaty – densaýlyq saqtaý, bilim berý jáne mádenıetti damytýǵa qoldaý jasap, kómek kórsetý. Gúlzeınep SÁDIRQYZY, «Egemen Qazaqstan». sýret: http://kokpekti.vko.gov.kz/