Sonyń biri – qurǵaq kıiz basý tehnıkasyna negizdelgen kórkem jumys. Jobaǵa qatysqan oqýshylar tabıǵı júnmen jumys isteý arqyly tek qolóner tásilderin meńgerip qana qoımaı, shydamdylyq pen uqyptylyqty, estetıkalyq talǵamdy damytty. Ulttyq mádenıetke súıengen kompozısııada Qazaqstannyń sáýlettik nyshandary, ulttyq rámizder men tabıǵat elementteri úılesim tapqan.
Joba barysynda oqýshylar qurǵaq kıiz basý tehnıkasynyń qyr-syryn ıgerip, qolóner arqyly ulttyq qundylyqtardy tereńirek tanydy. Sonymen qatar shyǵarmashylyq oılaý qabiletin damytyp, ujymmen birlese jumys isteýdiń mańyzyn sezindi. Árbir jumys – oqýshynyń ishki álemi men jeke kózqarasynyń kórinisi retinde qalyptasty.
Qolóner sabaqtary balalar úshin tek ásem buıym jasaý úderisimen shektelmeıdi. Ol eńbekke, ónerge degen qurmetti arttyryp, óz oıyn erkin jetkizýge, nátıjege jaýapkershilikpen qaraýǵa úıretedi. Osyndaı ortada ár oqýshy óz ıdeıasyn júzege asyryp, shyǵarmashylyq erkindikke ıe bolady.
Jobany uıymdastyryp, baǵyt-baǵdar bergen joba jetekshisi, tehnologııa pániniń muǵalimi Pernegúl Demeýova oqýshylardyń ulttyq ónerge qyzyǵýshylyǵyn arttyrýdy basty maqsat etkenin atap ótti.
