Petropavlda saıasatker-áıelder klýbynyń tóraıymy saılandy

PETROPAVL. 25 aqpan. Qyzyljar óńirindegi saıasatker-áıelder klýbynyń jańa jyldaǵy alǵashqy májilisi ótti. Bul týraly egemen.kz tilshisi habarlady. Búginde elimizdiń Qostanaı oblysynan basqa óńirlerdiń bárinde saıasatker-áıelderdiń klýbtary jumys isteıdi. Oblysta mundaı klýb byltyr qurylyp, sodan beri áleýmettik-ekonomıkalyq salalarda úlken belsendilik kórsetip keledi. Jıynda birinshi bolyp sóz alǵan M.Qozybaev atyndaǵy Soltústik Qazaqstan memlekettik ýnıversıtettiń prorektory Múkaram Taıjanova Qazaqstan genderlik saıasat reıtıngi jóninen álemdegi 146 eldiń arasynan 46-oryn alatynyn aıta kelip, bul baǵyttaǵy kórsetkishti keminde 30 paıyzǵa jetkizý úshin jumystardy kúsheıtýdegi óz oılarymen bólisti. Oblystyq isker áıelder assosıasııasynyń jetekshisi Baqytjan Sámıeva klýb óńirge tanymal, bedeldi 25 áıeldi biriktiretinin, olar atqaryp otyrǵan sharalardyń mańyzdylyǵyn atap kórsetti. Qazaqstan isker áıelder Assosııasııasynyń prezıdenti Raýshan Sársembaeva klýb múshelerine sharalardy aýdandar men eldi mekenderde kóbirek atqarý mindetterin júktedi. Saıasatker-áıelder klýbynyń tóraıymy bolyp oblys ákiminiń orynbasary Anarhan Dúısenova saılandy. О́mir Esqalı. Derek, sýret: egemen.kz.