Foto: Aqorda
Prezıdent Qasym-Jomart Toqaev jeńimpazdardy shyn júrekten quttyqtap, olar naǵyz qazaq jaýyngeri rýhynyń qandaı bolatynyn álem jurtshylyǵyna pash etkenin, Qazaqstannyń bedelin bıikke kótergenin atap ótti.
«Namysty qoldan bermeı, baıraqty básekede top jardyńyzdar! Sonyń arqasynda kók Týymyz jelbiredi. Elimizdiń mereıi ústem boldy. Halqymyz sizderdi maqtan tutady. Álemniń 48 elinen 100-den astam komanda jınalǵan Dýbaıdaǵy dúbirli doda – halyqaralyq mańyzy bar oqıǵa. Bul asa tartysty jarys dep aıtsaq, qate bolmaıdy. Sebebi barlyq komandalar bes kún boıy óte kúrdeli maqsattarǵa qol jetkizý úshin kóptegen tosqaýyldardy eńserýi qajet boldy. Biraq bizdiń jaýyngerler baryn saldy, áskerı mindetterdi minsiz oryndap, aqyry eń joǵary deńgeıdegi sheberlikterin kórsetti. Mundaı jarysqa ár memleket óziniń eń myqty sarbazdaryn jiberedi. Soǵan qaramastan el úmitin aqtap, úzdikterdiń úzdigi ataný ońaı emes ekeni anyq. Bul kezdeısoq jetistik emes. Ár jetistik – zor erik-jiger men qajyrly eńbektiń jemisi. Ár jeńis – myqty kásibı daıyndyq pen asqan sheberliktiń aıqyn kórinisi. О́zderińiz bilesizder, byltyr osy bedeldi jarysta Qazaqstan quramasy eki kúmis júldeni enshiledi. Bıyl da sol jeńis jolyn jalǵastyryp, zor senim artqan ulttyq komandamyz abyroımen oraldy. «Qazaqstan S» komandasy teńdesi joq, ıaǵnı absolıýtti chempıon atandy. Bul – tamasha jetistik, bul jeńis osy týrnırdiń tarıhynda qalady. Jyldar zymyrap ótedi, biraq sizderdiń balalaryńyz, osy qýanyshty kúnderdiń kýási bolǵan, sizderdi qoldaǵan, sizderdi maqtan tutqan barlyq adamdar bul jeńisti árdaıym erekshe sezimmen eske alyp, aıtyp otyrady. Al «Qazaqstan A» komandasy ekinshi orynǵa ıe boldy. Bul da óte jaqsy, bárimizdi qýantqan keremet nátıje», dedi Qasym-Jomart Toqaev.
«Sulý qyzdarymyz óte joǵary deńgeıde óner kórsetti, sheberlikpen alǵa shyǵyp, áıelder arasynda top jardy. Qazaqstannyń namysyn qorǵaǵan bes quramanyń bári de úzdik 20 komandanyń tizimine kirdi. Bul naǵyz jasampaz otanshyldyq dep kúmánsiz aıtýǵa bolady. Tórtkúl dúnıe ul-qyzdarymyzdyń myqtylyǵyna kýá boldy. Sondyqtan taǵy da atap ótkim keledi, sizder kórsetken myqty taktıkalyq daıyndyq, aıryqsha kúsh-jiger men tamasha toptyq jumystyń arqasynda álem jurtshylyǵy qazaqtyń batyl, qaısar jáne ór rýhty ult ekenine kóz jetkizdi. Barshańyzǵa shynaıy rızashylyǵymdy bildiremin. Barlyq bapker men jattyqtyrýshyǵa jáne áskerı basshylarǵa, basqa da mamandarǵa zor alǵys aıtamyn», dedi Prezıdent.
«Qazirgi kúrdeli ári turaqsyz geosaıası ahýal el qaýipsizdigin qamtamasyz etýdiń tyń tásilderin ázirleýdi talap etedi. Sondyqtan memleket áskerı-kúshtik qurylymdardy keshendi túrde jańǵyrtýǵa, tehnologııalyq turǵydan jan-jaqty jaraqtandyrýǵa basa mán beredi. Sizderdiń jarystaǵy tabystaryńyz – elimizdiń kúshtik qurylymdaryn júıeli damytýdyń, ásker qataryndaǵy joǵary moraldyq rýh pen fızıkalyq daıarlyqtyń nátıjesi. Sizder Otanǵa qaltqysyz qyzmet etip, antqa adal bolsańyzdar, Qazaqstannyń qorǵanys qabileti nyǵaıa túsetinine senimdimin», dedi Qasym-Jomart Toqaev.
Memleket basshysy qazir elimiz aýqymdy ózgeristerdiń sheshýshi kezeńine qadam basqanyna nazar aýdaryp, 15 naýryzda azamattarymyz jalpyhalyqtyq referendýmda Konstıtýsııaǵa qatysty óz tańdaýyn jasaıtynyn eske saldy.
«Bul – el taǵdyryna tikeleı áser etetin asa mańyzdy sheshim bolmaq. Basty qujattyń jobasynda egemendigimizdi jáne memlekettigimizdi nyǵaıtatyn myzǵymas rýhanı jáne quqyqtyq qundylyqtar bekitildi. Qazaqstan Respýblıkasynyń aýmaqtyq, ıaǵnı jeriniń tutastyǵy, egemendigi, táýelsizdigi, adam men onyń ómiri, barlyq azamattardyń quqyqtary jáne bostandyqtary eń joǵary qundylyqtar retinde jarııalandy. Jaýapty ári jasampaz otanshyldyq uǵymy aıqyndaldy. Ádiletti Qazaqstan ıdeıasy, Zań jáne tártip qaǵıdaty jańa Konstıtýsııa jobasynda laıyqty ornyn tapty. Munyń bárin is júzinde ornyqtyrý – barshaǵa ortaq perzenttik paryz. Túptep kelgende, jańa Ata zańymyz elimizdiń odan ári damýyna jáne órken jaıýyna jol ashýy kerek. Al kúshtik qurylymdar men arnaıy jasaqtar el táýelsizdigi jáne halyq tutastyǵynyń tiregi bolýǵa tıis. Sebebi aldymyzda turǵan maqsat – bireý. Bul – keler urpaqqa qýatty ári ozyq memleketti amanat etý. Bárimiz bir el bolyp osy tarıhı mıssııany mindetti túrde iske asyramyz. El qorǵaý – eń abyroıly mindet. Naǵyz otanshyl, adal azamattar ǵana osy joldy tańdaıdy. Sizder keleshekte de ult múddesine minsiz qyzmet ete beresizder dep senemin», dedi Memleket basshysy.
Memleket basshysynyń Jarlyǵymen UAE SWAT Challenge-2026 halyqaralyq jarysynan jeńispen oralǵan bir top ofıser men áskerı qyzmetker Baýyrjan Momyshuly atyndaǵy II dárejeli «Aıbyn» ordenimen, «Jaýyngerlik erligi úshin» medalimen jáne Qazaqstan Respýblıkasy Prezıdentiniń Alǵysymen marapattaldy.
Marapattaý rásiminde UAE SWAT Challenge-2026 týrnıriniń qatysýshylary Nursultan Saparov, Darına Bıldenova, Maksım Býhmetov jáne Natalıa Mestoeva sóz sóıledi.
Aıta keteıik, búgin Qasym-Jomart Toqaev sýmo sportynyń otany Japonııada zor jetistikke jetken qazaqstandyq balýan Ersin Baltaǵulmen kezdesti. Kezdesý barysynda Prezıdent Ersin Baltaǵuldy II dárejeli «Barys» ordenimen marapattady.
Sondaı-aq, Prezıdent Qasym-Jomart Toqaev Reseı Federasııasynyń Prezıdenti Vladımır Pýtınmen telefon arqyly sóılesti.
