Sýret JI kómegimen jasalǵan
Ras, sońǵy jyldary tehpasporttyń formaty men ataýyna qatysty ózgerister boldy. Biraq bul menshik ıelerine qosymsha mindet júktemeıdi.
Buǵan deıin tehnıkalyq pasport birneshe márte jańartylǵan. Áýeli qujattan ıesiniń aty-jóni alynyp tastaldy. 2007 jyldan bastap balkon men lodjııa páterdiń jalpy aýmaǵyna eseptele bastady.
Al 2023 jyldan beri tehnıkalyq pasport «kadastrlyq pasport» dep atalady. Qazir bul qujat jańa salynǵan nysandarǵa nemese tehpasport jańartylǵan kezde beriledi. Soǵan qaramastan, buryn berilgen barlyq tehnıkalyq pasporttar zańdy kúshin saqtaıdy. Olardy mindetti túrde aýystyrý qajet emes.
Ataýy ózgergenimen qujattyń máni sol kúıi qaldy. Tehpasportta turǵyn úıdiń barlyq negizgi tehnıkalyq derekteri kórsetiledi: mekenjaıy, tirkeý kody, kadastrlyq nómiri, salynǵan jyly, qabat sany, jalpy jáne turǵyn aýmaǵy, bólmelerdiń sany men kólemi men qabyrǵa materıaly. Budan bólek, páterdiń jospar-shemasy men barlyq úı-jaılar kórsetilgen keste qosa beriledi.
Tehpasport – kez kelgen mámile úshin qajet negizgi qujat. Satyp alý-satý, ıpoteka rásimdeý nemese syıǵa tartý kezinde onsyz kelisim jasalmaıdy. Sondyqtan qujattaǵy málimetter páterdiń naqty jaǵdaıymen sáıkes bolýy shart.
Qujatty jańartý mynadaı jaǵdaıda kerek: eger qaıta josparlaý jasalsa, derekterde qate tabylsa, páter bólinse nemese biriktirilse jáne ıpotekalyq mámile aldynda bank talap qoısa. Al páterge ózgeris engizilmese ári ıpoteka josparlanbasa tehpasportty aýystyrýdyń qajeti joq.
Jańartý úshin Halyqqa qyzmet kórsetý ortalyǵyna nemese eGov portaly arqyly ótinish berýge bolady. Aldymen nysanǵa tehnıkalyq tekserý júrgiziledi. Mamandy shaqyrýdyń bastapqy quny 4 617 teńge, al qalǵan tólem páterdiń kólemi men kúrdeliligine baılanysty esepteledi. Daıyn qujatty HQKO-dan nemese eGov-taǵy jeke kabınetten alýǵa múmkindik bar.
Qysqasy, tehpasport joıylǵan joq. Buryn berilgen qujattar jaramdy. Eń bastysy – ondaǵy málimetter páterdiń naqty kúıine saı bolýy kerek. Al jańartý tek naqty qajettilik týǵan jaǵdaıda ǵana jasalady.
