Osymen tórtinshi ret ótken oblystyq baıqaýda jas mólsherine qaraı úsh sanatqa bólingen oqyrmandar qazaq jáne orys tilinde bas-aıaǵy 18 kitap oqyp shyqty. Ár kitapty oqyp bitirgen soń, sol kórkem shyǵarmanyń mazmunyna qurylǵan onlaın-test tapsyryp otyrdy. Úsh kezeńnen joǵary upaı jınaǵan oqyrmandar tórtinshi kezeńge iriktelip alyndy.
Máselen, qazaqtildi oqyrmandar arasynan 10–14 jas aralyǵyndaǵy balalar Baýyrjan Momyshulynyń «Ushqan uıa», Rústem Saýytbaıdyń «Shoko álem», Nur Dombaıjynyń «Qabaǵy tunjyr balaqaı» shyǵarmalaryn, 15-18 jas aralyǵyndaǵy jasóspirimder Oralhan Bókeıdiń «Ataý keresin», Spandııar Kóbeevtiń «Oryndalǵan arman» memýarlyq romanyn, Ivan Týrgenevtiń «Ákeler men balalar» romanyn, al jasy 19-dan joǵary eresek oqyrmandar Sábıt Muqanovtyń «Aqqan juldyz», Tólen Ábdiktiń «О́liara», Krıstın Hannanyń «Bulbul» romandaryn oqyp shyqty.
Baıqaýǵa qatysýshylardyń ishinde oqýshylar, stýdentter, san alýan salanyń ókilderi – jumysshylar, dárigerler, muǵalimder, memlekettik qyzmetshiler, kásipkerler, zeınetkerler bar. Alǵashqy úsh kezeńnen súrinbeı ótken 122 oqyrman L.Tolstoı atyndaǵy oblystyq ǵylymı-ámbebap kitaphanasynda ózderi oqyǵan úsh kitaptan alǵan áserlerin qaǵazǵa túsirip, esse jazdy.
Saltanatty jıynda oblystyq mádenıet basqarmasy basshysynyń orynbasary Saıat Júsipov kópshilikti oqyrmandar marafonynyń márege jetýimen quttyqtap, jeńimpazdardy marapattady.
«О́zderińizge belgili, Prezıdent Qasym-Jomart Toqaev kitap oqıtyn ozyq on eldiń qataryna ený kerek degen talap qoıyp otyr. Baıqaǵanymyz, oqyrmandardyń kóbi osy baıqaý bastalǵaly jyl saıyn qalmaı turaqty túrde qatysyp kele jatyr. Bul óńirde kitap oqýdy ómir saltyna aınaldyrǵan úlken oqyrman qaýym qalyptasqanyn kórsetedi. Sonymen qatar bıyl baıqaýǵa qatysqandardyń ishinde mektep oqýshylarynyń kóptigi bizdi erekshe qýantady», dedi S.Júsipov.
Baıqaýda eń joǵary upaı jınap, qalyń oqyrmannan qara úzip shyqqan 6 jeńimpazdyń árqaısysy birinshi dárejeli dıplomdar men 150 myń teńge kóleminde aqshalaı syılyqqa ıe boldy. Ekinshi oryn alǵan 12 adam 100 myń teńgeden, úshinshi oryn alǵan 18 oqyrman 75 myń teńgeden aqshalaı syılyq aldy. Budan tys, baıqaýdyń irikteý kezeńine ótken taǵy 18 oqyrmanǵa 25 myń teńgeden aqshalaı sertıfıkat tabys etildi.
Eresek oqyrmandar qatarynan Qostanaı qalasynyń turǵyny, ustaz Shynar Tólegenova oza shaýyp, birinshi oryndy jeńip aldy.
«Kitap – adamzat qundylyǵynyń eń bıigi. Búginde elimizde ult bolashaǵy úshin paıdasy zor túrli jobalardyń iske asýy úlken qýantarlyq jaıt. Sonyń biri de, biregeıi – «Oqy jáne jeń» baıqaýy. Atalǵan baıqaý arqyly shákirtterimniń ár buryshta kitap oqyp, kitaphanadan kitap izdep júrgeni men úshin zor qýanysh. Telefonǵa telmirgen zamanda mundaı kórinisti kórýdiń ózi, shyntýaıtyna kelgende, zor baqyt eken. О́zim oqyǵan úsh kitaptan úsh túrli áser aldym, úsh túrli kúı keshtim. «Aqqan juldyz» romanyn oqı otyryp, tarıh qoınaýyna bir súńgip, Shoqandaı uly tulǵanyń ómir jolyndaǵy oqıǵalardy kóz aldymnan ótkizdim. «О́liara» romanynda ar aldyndaǵy adamnyń shynaıy bet-beınesi kóńilimdi tolqytty. Sol óliara shaqtaǵydaı men de alasapyran kúıge tústim. Al «Bulbul» romanyn oqı otyryp, kózimnen tolassyz jas aqqanyn jasyrmaımyn. Roman janymdy tilip ótti desem, artyq bolmaıdy», deıdi jeńimpaz.
Jylyna eki márte ótetin baıqaýdy L.Tolstoı atyndaǵy oblystyq kitaphana ujymy bastan-aıaq uıymdastyryp, ózderine júktelgen mindetti abyroımen atqaryp keledi.
«Jobanyń aýqymy jyldan-jylǵa keńeıip keledi. Baıqaý onlaın túrde ótti. Bul shalǵaı eldi mekenderdiń turǵyndaryna qolaıly bolyp otyr. Bıyl, ásirese Jangeldın, Qarasý, Uzynkól, Áýlıekól, Qarabalyq, Jitiqara, Beıimbet Maılın aýdandarynan kóp oqyrman qatysty. Osy baıqaýdyń nátıjesinde óńirde kitap oqıtyn turǵyndardyń kóbeıgeni baıqalyp otyr», deıdi oblystyq kitaphananyń basshysy Sánııa Serikqyzy.
Qostanaı oblysy
