Dóńgelek ústelge memleket jáne qoǵam qaıratkerleri, kórnekti ǵalymdar, ǵylymı uıymdar men joǵary oqý oryndarynyń ókilderi qatysty. Jıynda Ulttyq akademııalyq kitaphana basshysy Kúmis Seıitova men Ǵylym jáne joǵary bilim mınıstrligi Til saıasaty komıtetiniń tóraǵasy Erbol Tileshov quttyqtaý sóz sóılese, akademık Kárimbek Qurmanálıev «Akademık Shora Sarybaevtyń 100 jyldyǵyna oraı atqarylǵan sharalardyń qorytyndylary», Ahmet Baıtursynuly atyndaǵy Til bilimi ınstıtýtynyń dırektory, professor Anar Fazyljan «Shora Sarybaev. Qazaq tiltanymynyń ózekti máseleleri» kitaby týraly, al professor Tynyshtyq Ermekova «Ǵalym. Ǵylym. Ǵıbrat» jınaǵy jaıynda baıandama jasady.
Sonymen qatar Til bilimi ınstıtýty daıyndaǵan «Qazaq tiltanymynyń ózekti máseleleri» qos tomdyǵy men halyqaralyq «Qazaq tili» qoǵamynyń bastamasymen jaryq kórgen «Ǵalym. Ǵylym. Ǵıbrat» jınaǵy, kópshilik nazaryna usynylyp, kitaphana qoryna tapsyryldy. Atalǵan kitaptarda ǵalymnyń dıalektologııa, leksıkologııa, til tarıhy, grammatıka, termınologııa, emle, stılıstıka, t.b. salalardaǵy ǵylymı murasy júıelengen. Sondaı-aq jıyn sońynda ǵalymnyń uly, «Sham-Shyraq» ǵylym, bilim men óner mırasyn qoldaý qorynyń ókili Qaırat Shorauly akademıktiń jeke kitaphanasynda saqtalǵan til bilimine arnalǵan myńǵa jýyq sırek basylymdy Ulttyq akademııalyq kitaphananyń Shora Sarybaev atyndaǵy oqý zalyna tapsyrdy.
