Eki frıraıder eskertý belgilerin elemeı, qary taptalyp arnaıy daıyndalǵan joldardan tys jerde syrǵanaýǵa shyqqan. Áp-sátte qar kóshkini jylystap, demalýshylardyń biri qalyń qar astynda qalyp, shyǵa almaı qalǵan.
Qutqarýshylardyń aıtýynsha, sol kúni kýrort aýmaǵynda qar kóshkininiń aldyn alý maqsatynda jasandy jolmen qar túsirý jumysy júrgizilgen. Alaıda kýrorttan tys keıbir ýchaskelerde qalyń qardyń kóbesi sógilgen.
«Qonaqtardyń kópshiligi daıyndalǵan trassalarda syrǵanap, erejelerdi saqtaıdy. Degenmen kóshkin qaýpi joǵary kezeńde belgilengen aımaqtardan asyp, tıym salynǵan betkeıde syrǵanaý qar kóshkini júrý yqtımaldyǵyn arttyrady. Sondyqtan barynsha qaýipsizdikti kúsheıtý maqsatynda birqatar trassalarda syrǵanaýdy ýaqytsha shektedik», deıdi shańǵy patrýli jáne kóshkin qaýipsizdigi qyzmetiniń jetekshisi Vıktor Lvov.
Kýrort aýmaǵynan tys jerde kóshkin astynda qalǵan raıder týraly aqparatty zardap shekken adamnyń serigi habarlaǵan. Ol oqıǵa jóninde dereý arqanjol operatoryna jetkizgen. Málimet birden kýrorttyń Jedel basqarý ortalyǵyna túsip, qutqarýshylar bekitilgen reglamentke sáıkes jedel áreketke kóship, der ýaqytynda jetti.
Zardap shegýshini qutqarý operasııasy barysynda qar kóshkininiń qaıta júrý qaýpi de boldy. Shańǵy patrýli jáne kóshkin qaýipsizdigi qyzmetiniń jetekshisi Vıktor Lvov toptyń is-qımylyn baqylap, jaǵdaıdy qadaǵalap asqan ábjildikpen áreket etti.
SOS sıgnaly ajaldan arashalady: Almaty taýlarynda jartasta turyp qalǵan azamat qutqaryldy
Omby qardyń astynda qalǵan 15 jyldyq tájirıbesi bar raıder Denıs Babkov bolyp shyqty. Ol sol kúni qaýip-qaterdi jete baǵamdamaı, eskertýlerge salǵyrttyqpen qaraǵanyna ókinishin de bildirdi.
«Búgin men úshin ekinshi týǵan kún. On bes jyl boıy syrǵanap júrip, dál bulaı bolady dep oılamappyn. Ańdaýsyzda trassadan shyǵyp ketip, jańa jaýǵan qalyń qarǵa meldektep qaldym. Shańǵymdy aǵytyp, ornymnan kóterile bergenimde, ústimnen kóshkin júrdi. Adamdardy kórip turasyń, biraq bir sátte qozǵala da, dem ala da almaı qalady ekensiń. Bul – ómir men ólimniń arasyndaǵy sanaýly sekýndtar. Qutqarýshylardy qushaqtap, eriksiz jyladym», deıdi japa shekken demalýshy.
Qazaqstan TMD-da alǵashqy: Qutqarýshylardyń biryńǵaı vedomstvoaralyq radıojelisi iske qosyldy
