Jaqynda ǵana Sport jáne týrızm mınıstrligi mánerlep syrǵanaýshy Mıhaıl Shaıdorov pen onyń komandasynyń daıyndyǵyna jumsalǵan qarjy týraly aqparat taratqan edi. Vedomstvo sportshyǵa memlekettik qoldaý tetigi barlyq kezeńde kórsetildi degenmen, sportshy tolyqqandy qoldaý tek sońǵy maýsymda ǵana kórsetilgenin aıtady. Tengrinews-ke bergen suhbatynda M. Shaıdorov óziniń jalaqysy týraly qupııa aqparattyń dúıim jurtqa jarııa bolǵany onyń kóńiline qaıaý túsirgenin jasyrmady.
«Meniń jalaqym týraly aqparattyń kópshilikke jarııa bolǵany kóńilimdi túsirgeni ras. Jeke aqparattyń bulaı jarııalanýy orynsyz dep sanaımyn. Shyqqan shyǵynǵa nege erekshe nazar aýdarý kerek boldy eken, túsinbeımin. Men jaı ǵana úzilissiz jattyǵyp, nátıjege jetýge tyrystym», dedi ol.
Mánerlep syrǵanaýshy eshqashan qoldaýdyń joqtyǵyna shaǵymdanbaǵanyn, alǵan qarajattyń barlyǵyn tek daıyndyqqa jumsaǵanyn atap ótti. Onyń pikirinshe, sportta júldeniń quny tek nátıjemen baǵalanýy tıis.
Olımpıada oıyndarynyń jabylý saltanatynda Qazaqstan týyn Mıhaıl Shaıdorov alyp shyqty
Sondaı-aq sportshy shyǵyndardyń edáýir bóligin otbasy men demeýshiler kótergenin aıtty. Alaıda olar bul týraly esh jerde jarııalamaǵan.
M. Shaıdorovtyń aıtýynsha, mánerlep syrǵanaýdaǵy kóptegen shyǵyndar zańda qarastyrylmaǵan. Máselen, mamandardyń shuǵyl ushaqpen qatynaýy, oqý-jattyǵý jıyndarynan tys turatyn baspana, táýliktik shyǵyndar, kostıýmder, mýzykaǵa lısenzııalar sııaqty shyǵyndar sportshynyń óz esebinen tólenedi.
Onyń aıtýynsha, ol 2025 jyly álem chempıonatynda kúmis medal alǵannan keıin ǵana onyń jalaqysy ósip, bapkerler men mamandardyń eńbegi tólene bastaǵan. Almaty men Astanadaǵy muz aıdyndary daıyndyqqa berilip, alǵash ret baǵdarlamalary men kostıýmderi, dáriger qyzmeti qarjylandyrylǵan. Buǵan deıin ol uzaq ýaqyt boıy eń bolmaǵanda eń tómengi jalaqyny kóterýdi suraǵan. Sebebi onyń qarajaty tipti bazalyq daıyndyqqa da jetpegen.
Aıta keteıik, 21 jastaǵy Mıhaıl Shaıdorov mánerlep syrǵanaýdan Olımpıada chempıony atandy. Memleket basshysy Qasym-Jomart Toqaev Mıhaıl Shaıdorovty qysqy Olımpıada oıyndarynyń chempıony atanýymen quttyqtady. Prezıdenttiń sheshimimen Mıhaıl Shaıdorov II dárejeli «Barys» ordenimen nagradtaldy.
