Foto: kolesa.kz (neırojeli kómegimen jasalǵan)
Jergilikti prokýratýra júrgizýshilerdi zańsyz ákimshilik jaýapkershilikke tartý deregin áshkereledi. Halyqstan telegram-arnasynyń habarlaýynsha, tártip saqshylary kólik ıelerine jalpy somasy 345 349 309 teńge bolatyn 32 260 hattama toltyrǵan. Olarǵa Súleımenov kóshesinde saǵatyna 40 shaqyrym jyldamdyqtan asqan degen aıyp taǵylǵan.
Prokýrorlyq tekseris barysynda atalǵan jol belgisi tıisti kelisimdersiz jáne jol qozǵalysy jaǵdaıyna taldaý jasalmaı ornatylǵany belgili boldy. Osylaısha polısııa zań talaptary saqtalmaı qabyldanǵan sheshimge súıenip, azamattardy jaýapqa tartqan.
Keıin atqarýshy organ jol belgisin alyp tastaǵanymen, shyǵarylǵan qaýlylar kúshinde qalyp qoıǵan. Sonyń saldarynan júrgizýshiler tólegen qarajatyn qaıtara almaǵan. Taraz qalasynyń turǵyny Svetlana Boıarkına sotqa júginip, óz quqyǵyn qorǵap shyqqan. Sot jol qozǵalysyn uıymdastyrý kezinde zań talaptary saqtalmaǵan degen sheshim qabyldady. Polısııa bul sheshimge shaǵym túsirmegen.
Qazirgi ýaqytta tek birneshe aıyppuldyń kúshi joıylǵan. Al turǵyndar ózderiniń zańsyz jaýapqa tartylǵanyn bilmeýi múmkin.
Endi polısııa departamenti prokýror usynǵan talaptardy oryndap, negizsiz óndirilgen qarajatty qaıtarý máselesin qarastyrýy tıis. Alaıda jaýapkershilik máselesi ashyq kúıinde qalyp otyr. Polısııa jol belgilerin ornatý ákimdiktiń quzyrynda ekenin aıtsa, ákimdik mundaı jumystar polısııanyń nusqamasy negizinde júrgiziletinin málimdegen.
Júzdegen mıllıon teńgeniń taǵdyry men kináli taraptyń jaýapkershiligi aldaǵy ýaqytta belgili bolmaq.
