Kompanııa qyzmetkerleri, enshiles jáne táýeldi kompanııa basshylary qatysqan is-sharada Senat depýtaty Bıbigúl Jeksenbaı, Májilis depýtaty, Konstıtýsııalyq komıssııa múshesi Murat Ábenov, «Qazaq gazetteri» seriktestiginiń bas dırektory, Konstıtýsııalyq reforma jónindegi komıssııa múshesi Dıhan Qamzabekuly konstıtýsııalyq ózgeristerdiń negizgi baǵyttaryn túsindirdi. Olar usynylyp otyrǵan ózgeristerdiń memleket basqarý júıesin jetildirýge, demokratııalyq ınstıtýttardy nyǵaıtý men azamattardyń quqyqtary men bostandyqtaryn qorǵaý tetikterin kúsheıtýge baǵyttalǵanyn aıtty. Jańa Konstıtýsııa jobasy eldiń saıası júıesin jańǵyrtyp, qoǵamdyq qatynastardy odan ári damytýǵa jol ashady. Qujat qabyldanǵan jaǵdaıda elimizdiń quqyqtyq memleket retinde damýyna jańa serpin berip, qoǵamdaǵy turaqtylyq pen birlikti nyǵaıtýǵa yqpal etedi.
Kompanııa basshysy da Konstıtýsııa jobasyn ázirleý barysynda qoǵam pikiri eskerilgenin, keń aýqymdy saraptamalyq talqylaýlar júrgizilgenin atap ótti. Túrli sala mamandary, zańgerler men qoǵam belsendileri atsalysyp, azamattardan túsken usynystar da nazarǵa alynǵan.
«Búginde elimiz mańyzdy tarıhı kezeńniń aldynda tur. Konstıtýsııalyq reforma zań ústemdigin nyǵaıtyp, bılik tarmaqtarynyń teńgerimin qamtamasyz etýge jáne azamattardyń quqyqtary men bostandyqtaryn qorǵaý kepildikterin kúsheıtýge baǵyttalǵan», dedi «Qazatomónerkásip» UAK» AQ basqarma tóraǵasy Meıirjan Iýsýpov.
Kezdesý sońynda Konstıtýsııalyq komıssııa músheleri qatysýshylardy 15 naýryzda ótetin respýblıkalyq referendýmǵa belsendi qatysýǵa shaqyryp, bul saıası oqıǵa eldiń bolashaǵyn aıqyndaıtyn tarıhı qadamdardyń biri ekenin aıtty.
