Foto: Aqorda
Qasym-Jomart Toqaev Konstıtýsııalyq reforma jónindegi komıssııanyń nátıjeli eńbegine aıryqsha toqtaldy.
Prezıdenttiń aıtýynsha, Komıssııa músheleri óte aýqymdy, tıimdi jumys atqaryp, memleket pen qoǵamnyń ózara senimi jáne seriktestigi asa mańyzdy ekenin aıqyn kórsetti.
Jalpyulttyq koalısııa músheleri de qajyrly qyzmet etti. Olar jańa Konstıtýsııanyń mán-mazmunyn jurtshylyqqa keńinen túsindirip, qajetti úgit-nasıhat jumysyn oıdaǵydaı atqardy.
«Búgin osy tarıhı sátke oraı, men Komıssııa quramynda bolǵan barsha azamatqa jáne Koalısııa múshelerine erekshe rızashylyǵymdy bildiremin.
Elimizdiń ár aımaǵy, aýdany men qalasynda qoǵamdyq belsendiler, olardyń ishinde eriktiler, ıaǵnı volonterler joǵary azamattyq jaýapkershilik tanytyp, Halyq Konstıtýsııasynyń qabyldanýyna zor úles qosty. Barshańyzǵa raqmetimdi aıtamyn», dedi Prezıdent.
Prezıdent Konstıtýsııany qabyldaýǵa arnalǵan saltanatty jıynǵa qatysty
Memleket basshysy atap ótkendeı, Halyq Konstıtýsııasy keleshek urpaq aldyndaǵy jaýapkershilikti tereń sezine otyryp qabyldandy.
«Ata zań – qýatty, kúshti, básekege qabiletti Qazaqstannyń jańa Jarǵysy.
Jańa Konstıtýsııa – kóne zamannan beri babalarymyzǵa baǵdar bolǵan dala zańdarynyń búgingi jalǵasy, urpaqtar arasyndaǵy sabaqtastyq kórinisi», dedi Qasym-Jomart Toqaev.
Prezıdenttiń sózinshe, zaman talabyna saı jańǵyrǵan bas qujat memlekettigimizdiń san ǵasyrlyq tarıhynan habar beredi.
«Qazirgi Konstıtýsııa naǵyz Ult zańy degen atqa laıyq. Onyń óne boıynda babalarymyz amanat etken eldik pen erlik rýhy, salt-dástúr, jasampazdyq jáne jańashyldyq uǵymdary toǵysqan.
Ata zań – memleket múddesiniń bolattaı berik qalqany. Konstıtýsııamyzdyń eń basty maqsattary – jerimizdiń tutastyǵyn, elimizdiń Táýelsizdigi men egemendigin qorǵaýǵa, azamattarymyzdyń quqyqtary men bostandyqtaryn saqtaýǵa, qoǵamdyq ádilet pen zań ústemdigin nyǵaıtýǵa kepildik berý, sondaı-aq bilim, ǵylym, ınnovasııa men mádenıetti damytý, tazalyqty dáriptep, tabıǵatty qorǵaýdy qamtamasyz etý.
Memleketimizdiń bas qujaty – halyq bolmysynyń myzǵymas nyshany, berekeli aýyzbirshiligimizdiń sımvoly», dedi Memleket basshysy.
Prezıdent: Jańa Halyq Konstıtýsııasy – keler urpaqpen birge jasaı beretin qasıetti qujat
