Mádenıet jáne ulttyq salt-dástúr kúnine oraı Ordabasy aýdany ortalyǵyndaǵy «Samuryq» alleıasynda bir mezette 50 baldyrǵannyń tusaýkeser rásimi ótti. Aýdan ákimdigi, sondaı-aq zııaly qaýym ókilderi men ardagerler salt-dástúrge saı baldyrǵandardyń tusaýyn kesip, aq batalaryn berdi. Qazaq halqy úshin tusaýkeser – bala ómirindegi mańyzdy ári tamyry tereń dástúrlerdiń biri. Bul rásim balanyń ómir joly ashyq, qadamy berik, bolashaǵy jarqyn bolsyn degen izgi nıetten týǵan. Jınalǵan kópshilik baldyrǵandarǵa aq tilegin arnap, jyly lebizin bildirdi.
Al Túrkistan qalalyq mádenıet úıinde ónerpazdar qonaqtardy «Aýyldyń alty aýyzy», «Jarapazan» syndy halyq ánderimen qarsy aldy. Sondaı-aq «Ýgaıym-aı» ájeler hory óner kórsetip, kelýshilerge «Naýryz dámderi» ulttyq taǵamdaryn usyndy. «Iаssy» halyqtyq folklorlyq ansambli «Ár ult áýenderi» kompozısııasyn oryndap, Q.Amanbaev «Dombyra» ánin shyrqady. Teatrlandyrylǵan kóriniste «Kún men Tún» beıneleri arqyly tabıǵattyń jańarýyn beıneleıtin sahnalyq qoıylym qoıyldy. Sonymen qatar Naýryz arýy, Umaı ana, Qydyr ata beıneleri qatysqan «Tazarý rásimi» kórermen nazaryna usynyldy.
Sonymen qatar merekelik kesh barysynda «Qara jorǵa», «Áz Naýryz», «Balaýsa», «Aq tilek» ánderi oryndalyp, «Etnostaıl», «Semser» toptary men basqa da ónerpazdar halyq ánderinen popýrrı shyrqady. Is-shara barlyq qatysýshynyń oryndaýyndaǵy «Naýryz dýman» ánimen qorytyndylandy.
Túrkistan oblysy
