Foto: Ábilqasym Esentaev
Búginde elimizde ulttyq sportty nasıhattaý ári jas býyn boıyna sińirý turǵysynda tııanaqty tirlik atqarylyp jatyr. Týrızm jáne sport mınıstrligi keltirgen derekke saı, qazir el aýmaǵynda 16 555 ulttyq sport úıirmesi jumys istep tur. Dúnıejúzilik toǵyzqumalaq qaýymdastyǵynyń bas hatshysy Maqsat Shotaev Naýryz qarsańynda ulttyq sporttyń ulyqtalýy baldyrǵandardyń úıirmeden úırengenderin mereke qarsańynda aǵa tolqynnyń tájirbıesimen tolyqtyrý úshinde utymdy ekenin atap ótti.
Ulttyq sport túrleri: kókpar men qyz qýý álemde qalaı nasıhattalyp jatyr
«Ulttyq sport kúni – halyqtyń mádenı murasyn, salt-dástúrin jáne tarıhı jadyn jańǵyrtatyn mańyzdy kún. Bul kún tek oıyn-saýyq emes, ulttyń rýhanı bolmysyn, dúnıetanymyn jáne ómir saltyn kórsetetin erekshe qubylys. Eń aldymen, ulttyq oıyndardyń tárbıelik máni zor ekenin eskersek, jastardy eptilikke, batyldyqqa, uıymshyldyqqa jáne tózimdilikke baýlıtyny qýantady. Sonymen qatar, ulttyq oıyndar kúni – urpaqtar sabaqtastyǵyn jalǵaıtyn kópir. Aǵa býyn óz bilgenin keıingige úıretip, mádenı murany saqtaýǵa úles qosady. Bul qoǵamda birlik pen ózara túsinistikti nyǵaıtady», dedi Maqsat Shotaev.
Sondaı-aq byltyrdan bastap ulttyq sport túrleri olımpıadalyq sport túrlerimen qatar basymdyqqa ıe boldy. Bul ulttyq sport ókilderiniń sheberligin shyńdaýǵa septigin tıgizetin maqsatty qarjylandyrýǵa jol ashyp otyr. Dúnıejúzilik toǵyzqumalaq qaýymdastyǵynyń bas hatshysy ulttyq oıyndardyń adamzattyq qundylyqqa aınalýy olardyń ámbebap qasıetterimen de baılanysty ekenin erekshe ekshedi.
«Kez kelgen halyqtyń oıyndarynda ádildik, dostyq, yntymaqtastyq, qurmet sııaqty ortaq qundylyqtar kórinis tabady. Sondyqtan ulttyq oıyndar tek bir ultqa ǵana emes, búkil adamzatqa ortaq rýhanı baılyq retinde baǵalanady. Qazirgi jahandaný dáýirinde ulttyq oıyndardy saqtaý – mádenı ártúrlilikti qorǵaýdyń mańyzdy bóligi. Olar arqyly ár halyq ózindik ereksheligin saqtaı otyryp, álemdik mádenıetke úles qosady. Ulttyq oıyndar túrli elder arasynda mádenı baılanys ornatyp, halyqtar dostyǵyn nyǵaıtýǵa yqpal etedi. Al osyndaı qyraǵy qyzmet atqaratyn ulttyq sporttyń mereke aıasynda aıtýly toılanýy qýantady», dep atap ótti Maqsat Shotaev.
Jalpy elimizde «Aqbıdaı» aýyl sport oıyndary, «Qazaqstan barysy» týrnıri, «Uly dala joryǵy» marafon-báıgesi jáne etnosport boıynsha túrli festıvalder jyl boıy uıymdastyrylady. Eńbektegen baladan, eńkeıgen qarııaǵa deıin qyzyǵa atsalysatyn sport tartystary ony úzdiksiz úgitteýge úles qosyp jatyr.
