Sýretti túsirgen – Aıaýjan О́teýlınova
«Jan ana» qoǵamdyq birlestigi óz jumysyn 2019 jyly erikti analar toby retinde bastaǵan. Búginde kópbalaly jáne az qamtylǵan otbasylarǵa qoldaý kórsetip, memlekettik baǵdarlamalardy júzege asyrýǵa baǵyt-baǵdar berip, quqyqtyq jáne psıhologııalyq kómek kórsetip keledi. Sondaı-aq qoǵamdyq is-sharalarǵa belsene qatysady.
Bıyl da dástúrdi dáripteý úshin Naýryz merekesi qarsańynda erekshe is-shara uıymdastyryp, qala turǵyndaryna kóterińki kóńil kúı syılady. Aıta keteıik, qoǵamdyq birlestik oblys kóleminde, ár aýdanmen jumys júrgizedi.
«Qatarymyzda kópbalaly analardan bólek, aqjaýlyqty ájeler de bar. Búgingi is-sharaǵa Ulan aýdanynyń «Asyl ájeler» toby belsene qatysyp jatyr. Bizde tigin sehy jumys isteıdi. Kórmege sol sehtan, ıaǵnı bizdiń birlestik músheleriniń qolynan shyqqan ulttyq kıimder, buıymdar qoıyldy. Qoǵam janashyry ári ana bolǵandyqtan, ulttyq qundylyqtardy bolashaq urpaqqa dáripteý – bizdiń mindet», dedi qoǵamdyq birlestik jetekshisi Gúljamal Bershimbekova.
Saltanatty is-sharada án shyrqalyp, jınalǵan kópshilik bı bıledi. Sondaı-aq qonaqtar sábıdi besikke bóleý rásimin kórip, ájelerdiń urshyq ıirgenin, ulttyq kıimder defılesin tamashalady.
«Halyqty qolónermen, ulttyq kıimderimizben tanystyryp, salt-dástúrden úzindi kórsetildi. Ejelgi dástúrden bastalǵan dúnıe, ata-babamyzdan qalǵan ósıet óz sabaqtastyǵyn tabýy kerek. Sondyqtan mundaı is-sharalardyń mańyzy zor», dedi Ulan aýdanynan kelgen Gúlzıǵa Rahymqalıqyzy.
Ájelerdiń bastamasymen, qala ákimdiginiń qoldaýymen uıymdastyrylǵan is-shara kóptiń kóńilinen shyǵyp, ystyq yqylasyna bólendi.
О́SKEMEN
