Respýblıka jurtshylyǵyna «Dárıdaı» dep tanylǵan Muqash aqynǵa kezdesken qarsylastyń bári: «Dombyra tarta almaısyń», deı beripti. Sonda Muqań:
«Aqynmyn, dombyram joq – esesinde,
Taǵdyrdyń bul jumbaǵyn sheshesiń be?
Jaratqan birin berse, birin bermes,
Qulaǵyn Jaratqannyń kesesiń be?», degen eken.
Sodan beri otyz alty jyl ótipti. Qazirgi Ulytaý aýdanynyń Sheńber aýylynda týǵan Muqash aǵanyń esimi «Dárıdaı» aqyn atalyp, respýblıka deńgeıinde tanymal boldy. 1989–2003 jyldary birneshe respýblıkalyq, halyqaralyq aıtystarǵa qatysyp, júldeger atandy. Kezinde Qonysbaı Ábilov, Ásııa Berkenova, Áselhan Qalybekova, Aıtaqyn Bulǵaqov, Shorabek Aıdarov, Dúısenbaı Jumaseıitov, Elena Ábdihalyqova syndy aqyndarmen aıtysty. Muqańnyń úlken dodaǵa alǵash barǵandaǵy tuńǵysh qarsylasy taldyqorǵandyq Aıtaqyn Bulǵaqov bolǵan eken. Sonda qarsylasynyń «tebegen» ekenin kórgen Muqash aqyn:
«Almaty – ras, ásem, jasyl qala,
О́ksheler, beımezgildeý tasyrlama.
Sahna taqyr-tuqyr bolyp ketti
Shabytyń baqaıyńnyń basynda ma?», degen eken.
Muqash Seıtqazınov at jalyn tartyp mingeli ónerden qol úzgen joq. Qazir Qazaqstannyń eńbek sińirgen qaıratkeri, Ulytaý aýdanynyń qurmetti azamaty, Y.Altynsarın atyndaǵy tósbelgi ıegeri. «Aqtuma», «Qara kitap», «Dárıdaı-júrek» jyr jınaqtarynyń avtory. Esimi «Qazaqstan aıtys aqyndary» ensıklopedııasyna engen.
Jetpistiń jotasyna abyroımen jetken aqyndy ulytaýlyqtar alaqanyna saldy. Aqynnyń mereıin tasytyp Jetisýdan – Aıtaqyn Bulǵaqov, Shyǵystan – Serik Qusanbaev, Syrdan – Elena Ábdihalyqova, Arqadan Qoılybaı Asan keldi. Teatrda ótken «Dárıdaı-dáýren» atty shyǵarmashylyq keshte aqynnyń «Dárıdaıdyń dápterinen» atty jańa jyr jınaǵynyń tusaýy kesildi. Onda avtordyń óleńderi, túrli basylymda jarııalanǵan maqalalary, tanymal tulǵalardyń avtor týraly jazbalary, suhbattary enipti. Jınaq Ulytaý aýdanynyń ákimi Amanjol Myrzabekovtiń qoldaýymen Astanadaǵy «Káýsar» baspasynan jaryq kórdi.
Saltanatty keshke Ulytaý oblysynyń ákimi Dastan Ryspekov qatysyp, izgi tilegin jetkizdi. Sonymen qatar aqynǵa Parlament Májilisiniń tóraǵasy Erlan Qoshanovtyń quttyqtaý haty men yqylas gúlin tabys etti. «Muqash aqynnyń jyrlaryn mánerlep oqý» baıqaýynyń qorytyndysy shyǵarylyp, jeńimpazdary marapattaldy. Osy kesh aıasynda Ulytaý aýdandyq tarıhı-ólketaný mýzeıi «Aıtystyń aqtańgeri – Dárıdaı» atty kórme uıymdastyryp, kórermen nazaryna usyndy. Kórmege aqynnyń jyr jınaqtary, jeke qujattary, fotosýretteri, marapattary, Aıtaqyn Bulǵaqov syılaǵan dombyrasy qoıyldy.
«Muqań ekeýmiz Almaty sahnasynda aıtysyp kórmesek te, aımaqtarda ótken iri jyr dodalarynda jolymyz san márte túıisti. Muqańnyń sahnada otyryp taban astynda sýyryp salyp aıtatyn jyr shýmaqtary, sóz saptasy, uıqastary, uly Abaı aıtqandaı, tep-tegis, aınalasy jup-jumyr bop keletin.
Aıtystan tysqary jerlerdegi Muqańnyń azamattyq ustanymy, aǵalyq qamqorlyǵy, kisiligi men kishiligi jaıly da aýyz toltyryp aıtýǵa bolady.
Jezqazǵanda ótken «Ulytaý úni» festıvalinde aıtysyp otyryp:
«Aýyly bul Muqańnyń Sheńber degen,
Sheńberge rızyqty Alla kem bermegen.
Sol eldiń qandybalaq qyranysyń,
Talaıdy sahnada sheńgeldegen», degenim bar edi. Sol qandybalaq qyran Muqash jetpis deıtin quzar shyńǵa qonaqtady», deıdi Serik Qusanbaev.
Ulytaý oblysy
