О́ńirde uıymdastyrylǵan jalpyhalyqtyq senbilikke shahar jurty bir kisideı belsendi qatysty. Aýqymdy sharaǵa oblys ákimi Erbol Qarashókeev te úles qosyp, oblys jurtshylyǵynyń ekologııalyq mádenıetin qalyptastyrýda atalǵan aksııanyń orny erekshe ekenin atap ótti.
«Memleket basshysy atap ótkendeı, búginde patrıotızm naqty isten, árkimniń jeke jaýapkershiliginen kórinis tabady. «Taza Qazaqstan» ekologııalyq aksııasy turǵyndardyń boıynda týǵan jerge degen qurmetti arttyryp, qorshaǵan ortaǵa jaýapkershilikpen qaraýdy qalyptastyrady», dedi E.Qarashókeev.
Jalpy sany 600-ge jýyq adam qatysqan ekologııalyq aksııa aıasynda Taraz qalasyna qarasty «Qyzylabad» turǵyn alabynda 10 myń qara tal egildi. Jaýapty tulǵalardyń aıtýynsha, mundaǵy jumys birrettik is-sharamen toqtap qalmaq emes. Bıyl bul aýmaqta 20 myń túp kóshet otyrǵyzý josparlanǵan. Qalǵan 10 myń kóshet kúz mezgilinde egiledi. Budan bólek, Taraz jurty «Qarasý-2» kanalynyń boıyndaǵy tazartý jumysyna qatysyp, turmystyq qaldyqty jınady.
Tazalyq jumysy Jambyl, Sarysý aýdandarynda da ótti. «Móldir bulaq» aksııasy aıasynda ótkizilgen senbilikke jergilikti turǵyndar belsendi qatysty. Aksııanyń maqsaty – tabıǵı sý kózderin qorǵaý, bulaq pen ózen-kóldi qoqystan tazartý, sondaı-aq jastardyń boıynda tabıǵatqa janashyrlyq pen ekologııalyq mádenıetti qalyptastyrý.
Sarysý aýdanyndaǵy senbilik Túrkistan aýyldyq okrýgine qarasty «Kósegeniń kók jony» aýmaǵynda uıymdastyryldy. Is-sharaǵa Sarysý aýdanynyń ákimi Sáken Mamytov, aýdandyq ardagerler jáne qoǵamdyq keńes músheleri, etnos ókilderi men jastar atsalysty. Qatysýshylar aldymen «Qamyr áýlıe» kesenesine zııarat etip, Quran baǵyshtady.
Jambyl aýdanynda ekologııalyq aksııa Aısha bıbi aýyldyq okrýgine qarasty Áýlıekól aýmaǵynda ótti. Is-shara barysynda bulaq kózi ashylyp, aınalasy abattandyryldy, sondaı-aq aǵash otyrǵyzyldy. Derekkózderge júginsek, bul aýmaqta ilgeride 11 bulaq kózi bolǵan. Sonyń biri qaıta ashylyp, el ıgiligine berildi. Aýyl turǵyndarynyń aıtýynsha, bul bastama óńirdi kógaldandyrýǵa, tórt túliktiń jaıylymyn jaqsartýǵa oń yqpal etedi.
«Ekologııalyq is-sharaǵa ásirese jastardyń belsendilik tanytyp jatqany kóńil qýantady. Elimizdiń, óńirimizdiń taza ári jasyl aımaqqa aınalǵanyn bárimiz quptaımyz. Osy baǵyttaǵy jumystyń úzdiksiz jalǵasatynyna senemiz. Bul qadam turǵyndardyń boıynda ekologııalyq mádenıetti qalyptastyrýǵa aıtarlyqtaı yqpal etedi», deıdi belsendi jastyń biri Jaqsylyq Gaýharbek.
Sondaı-aq dál osyndaı aksııa Jýaly aýdanynda da uıymdastyryldy. Aýdan turǵyndary Sh.Murtaza atyndaǵy saıabaqta, Jastar saıabaǵynda, Talapty aýylynda kógaldandyrý, tazalyq jumysyn júrgizdi. Jalpy, aýdanda sanıtarlyq tazalyqty qamtamasyz etý baǵytynda júıeli jumys qolǵa alynǵan. Jyl basynan beri Jýaly aýdanynda birneshe senbilik uıymdastyryldy. Eldi mekenderdegi aryq júıeleri tazartylyp, 460 tonna kúl-qoqys shyǵaryldy.
Jambyl oblysy
