Foto: Úkimettiń baspasóz qyzmeti
Kezdesý Aımaqtyq ekologııalyq sammıt – 2026 aıasynda ótti. Taraptar elimizdiń jańa Konstıtýsııasynda bekitilgen qorshaǵan ortany qorǵaý normalary men «Taza Qazaqstan» bastamasy negizinde birlesken jobalardy júzege asyrýdyń mańyzyn atap ótti.
Búgin elordada qatty turmystyq qaldyqtardy óńdep, elektr energııasyn óndirýge arnalǵan «Astana energııasy» ekoparki» ınvestısııalyq jobasynyń birinshi kezeńiniń qurylysy bastaldy. Jobaǵa 180 mln dollar ınvestısııa baǵyttalady. Birinshi kezeńde kásiporynnyń qýaty táýligine 1,5 myń tonnadan astam qaldyqty óńdeýge, al óndiriletin elektr energııasy 50 MVt-qa deıin jetýge tıis.
Joba aıasynda qaldyqtardy tazartýdyń zamanaýı kópsatyly júıeleri engizilip, ekologııalyq talaptardyń saqtalýyna erekshe mán berilmek. Osy maqsatta elordada «East Hope» JShS birlesken kásiporny quryldy. Nysandy paıdalanýǵa berý 2029 jyldyń maýsymyna josparlanǵan.
«Bizdiń memleketterimizdiń basshylary arasynda senimge qurylǵan qarqyndy dıalog ornyqqan, bul – birlesken ınvestısııalyq jobalardy júzege asyrý úshin negiz. Biz Qytaı tarapy men bızneske ekonomıkanyń damýyna qosqan úlesi úshin rızamyz jáne barlyq qajetti jaǵdaılardy jasaýǵa daıynbyz. «Astana energııasy» ekoparki jobasy elorda úshin ǵana emes, el úshin de strategııalyq mańyzǵa ıe. Úkimet osy jobany júzege asyrý úshin barlyq qajetti qoldaý sharalaryn kórsetedi», dedi Oljas Bektenov.
Premer-mınıstr Energetıka mınıstrligi men ákimdikke osy tájirıbeni basqa óńirlerge taratý múmkindigin qarastyrýdy tapsyrdy.
Qaldyqty kásip kózine aınaldyrdy: Aýyl turǵyny erekshe ekologııalyq jobany iske asyrdy
О́z kezeginde Shenzhen Energy Environment Co., Ltd dırektorlar keńesiniń tóraǵasy Van Gan jobanyń ekinshi kezeńin iske asyrýǵa nıetti ekenin jetkizdi. Onyń aıtýynsha, bul bolashaqta qatty turmystyq qaldyqtar polıgondarynda jınalǵan qoqysty tolyq joıýǵa múmkindik beredi. Qazirgi tańda kompanııanyń portfelinde táýligine 79 myń tonna qýattylyǵy bar 57 qoqys óńdeý zaýyty bar. Shenchjen qalasynda qaldyqtardyń 90%-y suryptalyp, kádege jaratylyp jatyr.
«Biz Qazaqstanda jumys isteý múmkindigin joǵary baǵalaımyz jáne jobany sapaly júzege asyrý úshin bar kúsh-jigerimizdi salýǵa daıynbyz. Kásiporyn Qytaı men Qazaqstan arasyndaǵy is júzindegi yntymaqtastyqtyń mańyzdy úlgisi bolatynyna senimdimin. Qazaqstan Úkimetiniń qoldaýymen jobany odan ári ilgeriletýdi josparlap otyrmyz», dedi Van Gan.
Kezdesý barysynda taraptar kómirmen jumys isteıtin jylý elektr ortalyqtaryn jáne gaz elektr stansalaryn ekologııalyq jańǵyrtý, sondaı-aq óndiristi jergiliktendirý baǵytyndaǵy áriptestikti de talqylady.
Jıyn qorytyndysynda taraptar jobany belgilengen merzimde iske asyryp, ekologııa jáne energetıka salalaryndaǵy yntymaqtastyqty keńeıtýge daıyn ekenin rastady.
