Foto: Ashyq derekkóz
«Eki el de – tabıǵı baılyǵy mol memleketter. Taý-ken salasynda, sonyń ishinde geologııalyq barlaý jáne jer qoınaýyn ıgerý isinde Qazaqstannyń tájirıbesi mol. Qos tarap osy baǵytta birlese kúsh jumyldyrýǵa daıyn. Elderimiz aýyl sharýashylyǵyna, ásirese, mal sharýashylyǵyna aıryqsha mán beredi. Qazirgi zamanda mal ónimderiniń halyqaralyq standarttarǵa saı ári qaýipsiz bolýy asa mańyzdy. Qazaqstanda mal aýrýyna qarsy tıimdi vaksına óndirisi jolǵa qoıylǵan. Biz elimizdiń vaksınalaryn Mońǵolııaǵa jetkizý, bolashaqta birlesken óndiris oryndaryn ashý múmkindigin qarastyrýǵa múddelimiz. Sondaı-aq Mońǵolııanyń jerdi ǵaryshtan baqylaıtyn júıe qurý bastamasyna qolǵabys etýge daıynbyz. Osy salaǵa qajetti bilikti mamandardy da daıarlaýǵa bolady. Qazaqstan sıfrlyq damý máselesine aıryqsha nazar aýdarady. Bul – elimizdiń bolashaǵyn, jahandyq básekedegi ornyn aıqyndaıtyn strategııalyq sala. Búgin Hýrelsýh myrza «Alem.AI» halyqaralyq ortalyǵyna jáne «Aqyldy qalany» basqarý ortalyǵyna» barady. Jalpy sıfrlandyrý salasyndaǵy ózara yntymaqtastyqty damytýǵa eki tarap ta múddeli», dedi Memleket basshysy.
Sonymen qatar Qazaqstan men Mońǵolııa prezıdentteri mádenı-gýmanıtarlyq baılanysty talqylaǵan.
«Byltyr Astanada ótken «Silk Way Star» halyqaralyq vokaldyq konkýrsynda Mońǵolııanyń Mıshel atty ánshisi birinshi oryn alyp, kórermenniń ystyq yqylasyna bólendi. Mundaı jobalar halyqtarymyzdyń ǵasyrlar boıy qalyptasqan rýhanı baılanysyn bekemdeıtini sózsiz. Sondaı-aq elderimizdiń bilim-ǵylym salasyndaǵy yntymaqtastyǵyn nyǵaıtýǵa mol múmkindik bar», dedi Qazaqstan Prezıdenti.
Qazaqstan men Mońǵolııa arasyndaǵy saýda kólemi 7,7 paıyzǵa ósti
Qasym-Jomart Toqaev Qazaqstan jyl saıyn mońǵol azamattaryna bilim granttaryn bólip kele jatqanyna nazar aýdardy.
«Biz grant sanyn kóbeıtip, Mońǵolııaǵa qajetti mamandar daıyndaý isine atsalysýǵa ázirmiz. Bıyl Mońǵolııada «Study in Kazakhstan» bilim jármeńkesin ótkizý josparlanýda. Sonymen qatar biz Ulan-Batyr qalasynda Qazaqstannyń irgeli ýnıversıtetiniń fılıalyn ashýdy usyndyq. Buǵan qosa, eki eldiń qalalary arasyndaǵy baýyrlastyq qarym-qatynasty odan ári damytýǵa kelistik. Bul sharalar elderimizdiń dostyǵyn bekemdeýge, saýda-ekonomıkalyq jáne mádenı-gýmanıtarlyq baılanysty kúsheıtýge jol ashady. Osy jumysty jalǵastyra berý mańyzdy dep sanaımyn», dedi Memleket basshysy.
Qasym-Jomart Toqaev Mońǵolııa Prezıdentiniń Qazaqstanǵa memlekettik sapary óte nátıjeli ótip jatqanyn aıtty.
«Qazaqstan men Mońǵolııanyń aımaqtyq jáne jahandyq deńgeıdegi kóptegen ózekti másele boıynsha ustanymdary – uqsas. Erteń ótetin Ekologııalyq sammıt – sonyń aıqyn kórinisi. Biz Mońǵolııamen yntymaqtastyqty damytýǵa aıryqsha kóńil bólemiz. Halyqaralyq uıymdar aıasynda biz bir-birimizge únemi qoldaý kórsetip kelemiz. Bul elderimizdiń strategııalyq seriktestigi jáne ózara seniminiń naqty kórinisi ekeni anyq. Men muny joǵary baǵalaımyn», dedi Qazaqstan Prezıdenti.
Baıan-О́lgeı aımaǵynda Qazaqstannyń konsýldyq mekemesi ashylady
Ýhnaagıın Hýrelsýh búgingi kelissózderge joǵary baǵa berdi.
«Qurmetti Prezıdent, biz Sizdiń Mońǵolııa men Qazaqstan arasyndaǵy yntymaqtastyqty damytýǵa qosqan úlesińizdi joǵary baǵalaımyz. Búgingi qol jetkizilgen ýaǵdalastyqtar men birlesken is-qımyl jospary nátıjeli júzege asyp, eki eldiń ıgiligine qyzmet etetinine kámil senemin. Baýyrlas halyqtarymyzdyń dostyǵy urpaqtan urpaqqa ulasyp, strategııalyq áriptestigimiz ben yqpaldastyǵymyz máńgi jasaı bersin!», dedi Mońǵolııa Prezıdenti.
