Foto: Ashyq derekkóz
Memleket basshysy tranzıttik áleýetti arttyrý maqsatynda Qazaqtan men Mońǵolııa arasynda tóte jol salý týraly kelisimge qol jetkizilgenin atap ótti.
«Jol eki el arasyndaǵy ózara baılanys kózi, tyǵyz qarym-qatynas kepili ekeni belgili. Biz bul máseleniń asa ózekti ekenin jaqsy túsinip otyrmyz. Sondyqtan Hýrelsýh myrza ekeýimiz Qazaqstan men Mońǵolııa arasynda tóte jol ashýǵa múddeli ekenimizdi rastadyq. Kezdesý barysynda elderimizdi jalǵaıtyn avtokólik jolyn salý jóninde ortaq kelisimge qol jetkizdik. Bul – árıne, jan-jaqty saraptap, muqııat zerdeleýdi qajet etetin kúrdeli másele. Desek te, eń bastysy, jol qurylysy boıynsha maqsatymyz – bir. Sol sebepti biz qurmetti Prezıdent myrzamen jasalǵan ýaǵdalastyqqa sáıkes aldymen birlesken Úkimetaralyq jumys tobyn qurý týraly sheshimge keldik», dedi Qasym-Jomart Toqaev.
Sonymen birge jańa jol torabynyń salynýy kórshi memleketter arasyndaǵy saýda aınalymyn arttyryp, ortaq týrıstik klassterdi damytatyndyǵyn jetkizdi.
«Aldaǵy ýaqytta Qazaqstan – Mońǵolııa avtojoly elderimizdiń arasyndaǵy saýda-sattyqty arttyrýǵa erekshe serpin beretini anyq. Bul joldyń ıgiligin irgeles elder de kóretin bolady. Barshańyzǵa málim, men byltyr Qytaıda ótken Shanhaı yntymaqtastyǵy uıymynyń Sammıtinde «Transaltaı suhbat alańyn» qurýdy usyndym. Altaıdyń tórt jaǵyn meken etken memleketterdiń saýda, kólik-logıstıka, týrızm, mádenıet salasyndaǵy máseleler boıynsha ortaq mámilege kelýine tolyq múmkindik bar. Osy rette tórt eldiń kólik-logıstıka áleýetin bir arnaǵa toǵystyryp, birlese jumys isteı alamyz. Bul qadam alys-beristi ǵana emes, «Altaı» biregeı týrıstik klasterin damytýǵa jol ashady», dedi Prezıdent.
Baıan-О́lgeı aımaǵynda Qazaqstannyń konsýldyq mekemesi ashylady
Kelissóz barysynda áýe qatynasyn jandandyrý máselesine aıryqsha mán berildi. Memleket basshysynyń aıtýynsha, kezdesýde «О́skemen – О́lgeı» baǵyty boıynsha áýe qatynasyn ornatý jóninde kelisim jasalǵan.
«Qazir «Almaty – Ulan-Batyr» baǵytynda turaqty reıster bar. Kóp uzamaı «Astana – Ulan-Batyr» áýe qatynasy qaıta ashylady. Budan bólek, biz osy sapar aıasyndaǵy kelissózder nátıjesinde «О́skemen – О́lgeı» baǵyty boıynsha áýe qatynasyn ornatý jóninde naqty kelisimge keldik. Bul mańyzdy sheshimniń arqasynda yntymaqtastyǵymyz odan ári nyǵaıyp, aımaqaralyq baılanystarymyz tyń serpinmen damı túseri sózsiz. Bul tusta da Mońǵolııa eliniń basshysy – qurmetti Hýrelsýh myrzaǵa jáne mońǵol tarapynan osy máseleni sheshýge atsalysqan barsha azamatqa alǵys aıtamyn», dedi Qazaqstan Prezıdenti.
