Foto: Jambyl oblysy ákimdigi
Jambyl oblysynyń ákimi Erbol Qarashókeev óz sózinde bul bastamanyń tabıǵatqa janashyrlyqty, ulttyq qundylyqtarǵa degen qurmetti jáne halyqaralyq yntymaqtastyqty aıqyn kórsetkenin atap ótti.
– Kún shýaǵyna bólengen qyzǵaldaq alqaby – tek tabıǵattyń kórki ǵana emes, ol – dala órkenıetiniń únsiz shejiresi, ulttyq rýhtyń tiri aıǵaǵy. Osyndaı ıgi ister arqyly biz tabıǵat pen dástúrdi ushtastyryp, keler urpaqqa amanat bolar qundylyqtardy dáriptep kelemiz. Bul festıval Jambyl óńiriniń týrıstik áleýetin álemge tanytýǵa zor múmkindik beredi, – dedi Erbol Qarashókeev.
Jambyl óńiri – qyzǵaldaqtyń otany. Munda qyzǵaldaqtyń 18 túri ósedi, onyń 10-y Qazaqstannyń Qyzyl kitabyna engizilgen. Aımaq qyzǵaldaq túrleriniń san alýandyǵy boıynsha respýblıkada aldyńǵy orynda.
Bıylǵy festıvaldiń basty jańalyǵy – Nıderland Koroldigi tarapynan Jambyl oblysyna 40 myń túp qyzǵaldaq tuqymyn tartý etti. Qundy syılyqty Holland Bulb Market kompanııasynyń menedjeri, Nıderland eliniń ókili Marselı Pehna saltanatty túrde tabystady.
Festıval aıasynda taý bókterinde tigilgen kıiz úıler men altybaqandar ulttyq naqyshty aıshyqtap, qolónershiler kórmesi sharanyń kórkin asha tústi. Ulttyq sporttyń segiz túrinen ótken jarystar kórermenge erekshe áser syılap, jeńimpazdarǵa qarjylaı sertıfıkattar tabystaldy.
Qymyzmuryndyq dástúri de jańǵyrtylyp, merekeniń mazmunyn baıyta tústi.
Shara barysynda qonaqtar Qarataý bókterindegi qyzǵaldaq alqabyn tamashalap, erekshe áserge bólendi.
«Qyzǵaldaq mura» festıvali «Taza Qazaqstan» respýblıkalyq ekologııalyq aksııasymen úndese tústi. Sherhan Murtaza atyndaǵy halyqaralyq Taraz ýnıversıteti men «Aýyl» partııasynyń 200-den astam erikti festıval aýmaǵyn qoqystan tazartty.
