Atalǵan telekópirge Ulytaý oblysynyń ákimi Dastan Ryspekov Jezqazǵan qalasynyń ortalyǵynan tikeleı qosyldy. Oǵan Qazaqstan halqy Assambleıasynyń óńirlik fılıaly ókilderi, jastar, memlekettik qyzmetkerler, eriktiler, kásiporyn qyzmetkerleri jáne qoǵam belsendileri qatysty.
Tikeleı efır barysynda Memleket basshysy bul bastamanyń urpaq aldyndaǵy mańyzy zor ekenin atap ótti. Ol óz sózinde:
«Birtutas qundylyqtar júıesin quraıtyn «Taza Qazaqstan», «Zań jáne tártip», «Adal azamat» qaǵıdattary qoǵamdyq ómirde berik ornyǵýy tıis. Bul bastamalardy keńinen nasıhattaýǵa tanymal ári bedeldi azamattardy belsendi tartý qajet. Al osy ıdeıanyń negizgi qozǵaýshy kúshi – jastar. Ekologııalyq mádenıetti erte jastan qalyptastyrý asa mańyzdy. «Taza Qazaqstan» halyqtyń ómir sapasy men ál-aýqatyn arttyrýǵa baǵyttalǵan ulttyq ıdeıaǵa aınalýy tıis», dep atap ótti.
Telekópir aıaqtalǵannan keıin qatysýshylar aǵash otyrǵyzýǵa kiristi. Aksııa aıasynda Jezqazǵan qalasyndaǵy saıabaqqa 275 túp, al Joshy han tarıhı-mádenı kesheniniń aýmaǵyna 510 túp jas kóshet otyrǵyzyldy. Jalpy oblys boıynsha bir kúnde 1550 túp jasyl jelek egildi.
Aıta ketý kerek, Ulytaý oblysynda eldi mekenderdi kógaldandyrý, aýmaqtardy abattandyrý jáne ekologııalyq mádenıetti qalyptastyrý baǵytyndaǵy jumystar júıeli túrde jalǵasyp keledi. Jyl basynan beri jeti ret senbilik ótkizilip 20 myńnan astam adam, 1551 ujym jáne 416 tehnıka jumyldyrylyp, 2749,9 tonna qoqys shyǵaryldy. Sonymen qatar 700,7 gektar aýmaq tazartylyp, 10 894 túp aǵash otyrǵyzyldy.
Toqaev «Taza Qazaqstan» aksııasyna belsendi qatysqan azamattardy marapattady
Ulytaý oblysy
