Sóz bolyp otyrǵan jeıde – Gretskıdiń 1988 jylǵy Stenlı kýbogynyń fınalynda kıgen oıyn formasy. Ol Goldin Auctions aýksıonynda 2,8 mıllıon AQSh dollaryna (shamamen 1,2 mıllıard teńge) satylǵan.
Bul forma Adidas kompanııasy shyǵarǵan jáne tarıhı oıyndardyń birinde qoldanylǵan. 1988 jylǵy fınaldyń tórtinshi matchynda «Boston Brıýınz» ben «Edmonton Oılerz» kezdesip, oıyn 6:3 esebimen aıaqtalǵan bolatyn.
Buǵan deıin, 2022 jyly dál osy djersı 1,452 mıllıon dollarǵa satylyp, sol kezde rekord ornatqan edi. Al jańa satylym bul somany eki esege jýyq arttyryp, hokkeı formalary arasyndaǵy eń qymbat zat atandy.
Aıta keteıik, Ýeın Gretskı – Ulttyq hokkeı lıgasynyń ańyzy, lıga tarıhyndaǵy eń úzdik bombardır sanalady. Ol «Edmonton Oılerz» klýbymen birge tórt ret Stenlı kýbogyn jeńip alǵan.
