Foto: Aqorda
«Bul salada naqty jetistikterimiz bar. Osy kezge deıin qazaq-túrik iskerlik toptarynyń birlesken kúsh-jigeriniń arqasynda jalpy quny 7,6 mıllıard dollarǵa teń 142 joba júzege asty. Solardyń qatarynda turǵan YDA Holding kompanııasyn atap ótkim keledi. Bul kompanııa elimizde kópsalaly óndiris keshenin ashty. Sonymen qatar alıýmınıı óndirisin jandandyryp, medısınalyq buıymdar shyǵaryp jatyr. Al Panelsan, Betek Boya kásiporyndary qurylys jáne hımııa ónerkásibine qatysty jobalardy júzege asyryp jatyr. Aksa Energy kompanııasy Qyzylorda oblysynda zamanaýı elektr stansııasyn iske qosty. Bul jobalar Qazaqstannyń óndiristik qýatyn arttyrýǵa septigin tıgizeri anyq», dedi Qasym-Jomart Toqaev.
Prezıdenttiń pikirinshe, kólik-logıstıka salasyndaǵy baılanysty nyǵaıtý aıryqsha mańyzdy.
«Qazaqstan – Qytaı men Eýropany jalǵap turǵan memleketterdiń biri. Qazir osy baǵyttaǵy júk tasymalynyń 85 paıyzy bizdiń elimiz arqyly ótedi. Transkaspıı halyqaralyq kólik baǵyty, ıaǵnı, Orta dáliz, Qazaqstannyń tasymal salasyndaǵy áleýetin arttyrýǵa oń yqpal etip otyr. Sońǵy jyldary osy dáliz arqyly ótken júk kólemi 5 eseden astam ósti. Byltyr konteınerlik júk tasymaly 36 paıyzǵa kóbeıdi. Kóp uzamaı bul kórsetkishti 10 mıllıon tonnaǵa jetkizýdi kózdep otyrmyz. Biz tranzıttik tasymal júıesin tıimdi úılestirý úshin «Smart Cargo» biryńǵaı sıfrlyq basqarý platformasyn ázirledik. Jalpy, Orta dálizdiń múmkindigin arttyrý barshamyzdyń múddemizge saı keledi. Sondyqtan túrik tarapyna «e-permit» jobasyn birge júzege asyrýdy usynamyz. Bul joba júk rásimderin elektrondy túrde, ıaǵnı, meılinshe ashyq júrgizýge múmkindik beredi. Sondaı-aq ákimshilik shyǵyndardy azaıtady. «Orta dáliz» jobasyn «Tramptyń halyqaralyq beıbitshilik jáne órkendeý joly» (TRIPP) bastamasymen ushtastyrý mańyzdy dep sanaımyn. Budan bólek, túrik kásipkerleri elimizdiń áýejaı ınfraqurylymyna qomaqty ınvestısııa salǵanyn erekshe atap ótken jón. Qazir TAV Holding kompanııasy Almatydaǵy halyqaralyq termınaldy jańǵyrtyp jatyr. Al S Sistem Lojistik kompanııasy Aqtóbe áýejaıynda logıstıka ortalyǵyn salýdy josparlap otyr. Bul jobalar Qazaqstandaǵy áýe tasymalynyń áleýetin arttyrýǵa jol ashady», dedi Memleket basshysy.
Qasym-Jomart Toqaev pen Rejep Taııp Erdoǵan Qazaqstan-Túrkııa bıznes forýmyna qatysty
Sonymen qosa, Qasym-Jomart Toqaev agroónerkásip jáne aýyl sharýashylyǵy salasyndaǵy yntymaqtastyqty kúsheıtý qajet ekenin málimdedi
«Qazaqstan egin alqaptarynyń aýmaǵy boıynsha álemde altynshy orynda tur. Sondaı-aq elimiz astyq eksporttaıtyn eń iri on memlekettiń qataryna kiredi. Byltyr dıqandarymyz 27 mıllıon tonna astyq jınady. Sońǵy bes jylda aýyl sharýashylyǵy ónimderiniń eksporty 1,8 ese ósti. Osylaısha, Qazaqstan Global Food Security ındeksi boıynsha 32-shi orynda tur. Byltyr eki el arasyndaǵy aýyl sharýashylyǵy ónimderiniń alys-berisi 25 paıyzǵa artty. Alaıda, elderimizdiń bul saladaǵy áleýeti zor. Mysaly, Tiryaki Holding kompanııasy Astanada bıdaı men burshaqty tereń óńdeıtin zaýyt salmaqshy. Sondaı-aq İskefe Holding kásiporny jelatın óndirisin qolǵa almaq. Alarko Holding kompanııasy Shymkentte jylyjaı keshenin salýdy josparlap otyr. Osy jobalardyń barlyǵy óńdeý ónerkásibin órkendetip, eksporttyq áleýetimizdi arttyrýǵa septigin tıgizedi dep senemin. Budan bólek, biz zamanaýı agrotehnologııany engizýge, sýarý júıesin damytýǵa erekshe mán berip otyrmyz. Sondaı-aq veterınarııa jáne fıtosanıtarııa salalarynda birlese jumys isteýge nıettimiz. О́z tarapymyzdan Túrkııaǵa «halal» standartyna saı keletin et ónimderin eksporttaýǵa daıynbyz», dedi Prezıdent.
Prezıdent: Bızneske qolaıly jaǵdaı jasaý memlekettik saıasattyń basym baǵytynyń biri
Memleket basshysy otandyq farmasevtıka ónerkásibi men medısına ınfraqurylymyn damytýdy óte mańyzdy baǵyt sanaıtynyn jetkizdi
«Túrkııanyń Abdi İbrahim jáne Nobel sekildi dári-dármek óndiretin iri kompanııalary sheteldegi alǵashqy zaýyttaryn Qazaqstanda ashqan bolatyn. YDA Group Túrkistan jáne Petropavl qalalarynda kópbeıindi aýrýhanalar salyp jatyr. Al Orzax Group kompanııasy Túrkistan oblysynda bıologııalyq belsendi qospalar óndiretin zaýyt salmaqshy. Biz bul bastamalardy tolyq quptaımyz. Elimiz túrik kompanııalarymen tyǵyz jumys isteýge jáne olarǵa qolaıly jaǵdaı jasaýǵa ázir. Osy jobalar Qazaqstannyń aımaqtaǵy dári-dármek óndiretin jáne ony eksporttaıtyn ortalyq retinde qalyptasýyna zor yqpal eteri anyq», dedi Qasym-Jomart Toqaev.
