Foto: Aqorda
«Biz ozyq tehnologııalardy túrli salaǵa engizý jumysyna erekshe mán berip otyrmyz. Qazaqstan naǵyz sıfrlyq el bolý úshin naqty qadamdar jasaýda. Elimizde Jasandy ıntellekt jáne sıfrlyq damý mınıstrligi quryldy. Biz eki iri sýperkompıýterdi iske qostyq. Astanada Alem.ai halyqaralyq jasandy ıntellekt ortalyǵy ashyldy. Biz elimizdegi orta bilim berý júıesine jasandy ıntellektini engizý úshin aýqymdy sharalardy júzege asyra bastadyq. Osydan eki kún buryn men tıisti Jarlyqqa qol qoıdym. Atap aıtqanda, qazir elimizdiń aldynda bilim berý júıesin árbir oqýshynyń qarym-qabiletine saı beıimdeý, derbes derekterdi qorǵaý, sıfrlyq ınfraqurylymdy damytý, tehnologııany meńgergen pedagogterdi daıarlaý mindeti tur. Budan bólek, biz Alataý qalasyn kórkeıtýge aıryqsha nazar aýdaryp otyrmyz. Jańa Konstıtýsııada bul shaharǵa «qarqyndy damıtyn qala» quqyqtyq mártebesi berildi. Bul joba krıptoındýstrııanyń, ınnovasııa men tehnologııalyq bıznestiń órken jaıýyna zor múmkindik beredi. Sońǵy jyldary túrik bıznesiniń qazaq marketpleısterimen baılanysy nyǵaıa tústi. Mysaly, Kaspikz Hepsiburada kompanııasyn satyp aldy. Freedom Holding Túrkııada sıfrlyq ekojúıesin quryp, brokerlik qyzmetin jandandyra bastady. Biz túrik kompanııalarymen jasandy ıntellekt, fınteh, kıberqaýipsizdik, onlaın qyzmet salalarynda naqty jobalardy birlese júzege asyrýǵa qashanda daıynbyz», dedi Memleket basshysy.
Memleket basshysy: О́nerkásip salasyndaǵy yntymaqtastyqty odan ári damytý qajet
Túrkııa Prezıdenti qazaq jáne túrik kásipkerleriniń úles qosýynyń arqasynda Qazaqstanmen ekonomıkalyq qarym-qatynas nyǵaıyp kele jatqanyna qýanyshty ekenin jetkizdi.
«Qurmetti Qasym-Jomart Toqaevtyń kóregen basshylyǵymen Qazaqstannyń ekonomıka salasynda jetken jetistikterin jiti baqylap otyramyz. 2025 jyly eldiń ishki jalpy ónimi 6,5 paıyzǵa jetip, jan basyna shaqqanda 15 myń dollarǵa jaqyndady. Búginde Qazaqstandy syrtqy saýda aınalymy 145 mıllıard dollarǵa jetken Ortalyq Azııadaǵy ekonomıkasy eń aýqymdy el retinde bilemiz. Osy ósimniń nátıjesinde Qazaq eli 2025 jyly túrki álemindegi eń iri saýda-ekonomıkalyq seriktesimizge aınaldy. Árıne, biz munymen shektelmeımiz. Maqsatymyz – 15 mıllıard dollarlyq mejege jetý», dedi Rejep Taııp Erdoǵan.
Qasym-Jomart Toqaev pen Rejep Taııp Erdoǵan Qazaqstan-Túrkııa bıznes forýmyna qatysty
