LRT jelisinde jolaýshylar tarapynan qaýipsizdik erejelerin buzýdyń jekelegen jaǵdaılary tirkeldi.
Ondaı áreketter apattyq jaǵdaılarǵa jáne qozǵalystyń ýaqytsha kidirisine ákelýi múmkin. Atap aıtqanda, jolaýshylar tarapynan mynadaı jaǵdaılar tirkeldi:
- stansa platformasynda ornalasqan shuǵyl tejeý batyrmasyn negizsiz basý;
- poıyz ishinde qorǵanysh áınektiń artynda ornalasqan platformalyq esikterdi shuǵyl ashý batyrmasyn iske qosý;
- vagon esikterin ishinen óz betinshe ashýǵa áreket jasaý;
- esik jaqtaýlarynyń arasyna qolyn salyp, esikterdiń jabylýyna qasaqana kedergi keltirý.
LRT júıesi tolyq avtomattandyrylǵan, sondyqtan mundaı áreketterdiń barlyǵy júıe tarapynan qaýipsizdikke yqtımal qater retinde qabyldanady. Bul poıyzdyń toqtaýyna jáne dıspetcherlik ortalyq tarapynan qosymsha tekserýler júrgizilýine ákeledi.
«Jolaýshylardan LRT paıdalaný erejelerin saqtaýdy suraımyz. Eske salamyz: jeli kerneý astynda. Árbir quramnyń ishinde LRT poıyzynyń operatory bar, ol qajet bolǵan jaǵdaıda elektr qýaty ajyratylǵannan keıin ǵana esikterdi ashady», delingen habarlamada.
Barlyq quqyq buzýshylar stansalar men vagondardyń ishinde ornatylǵan beınebaqylaý kameralary arqyly anyqtalady. Bul faktiler boıynsha materıaldar quqyq qorǵaý organdaryna qylmystyq jaýapkershilikke tartý úshin beriledi, óıtkeni mundaı áreketter jolaýshylardyń qaýipsizdigine qater tóndirip, LRT jumysynyń turaqtylyǵyna áser etedi.
Eske sala keteıik, keshe Astanada kópten kútken LRT resmı túrde iske qosyldy.
Memleket basshysy Qasym-Jomart Toqaevqa LRT júıesiniń 001 serııaly jol júrý kartasy tabystaldy.
Buǵan deıin Astanadaǵy LRT júıesiniń №117 «Jibek joly» stansııasy áli paıdalanýǵa berilmegenin jazǵan edik.
