Foto: Ashyq derekkóz
Almaty oblystyq polısııa departamenti adam ólimine ákelgen jol-kólik oqıǵasy faktisin rastady, alaıda kúdiktiniń jeke basy resmı túrde jarııa etilmegen. Kúdikti retinde 37 jastaǵy er adam ustalǵan.
«Oqıǵa saldarynan áıel adam alǵan jaraqattarynan oqıǵa ornynda kóz jumdy. Atalǵan fakti boıynsha qylmystyq is qozǵaldy. Qazirgi ýaqytta bolǵan jaǵdaıdyń barlyq mán-jaıyn jan-jaqty, tolyq jáne obektıvti anyqtaýǵa baǵyttalǵan barlyq qajetti tergeý áreketteri júrip jatyr», dep tolyqtyrdy vedomstvo.
Sonymen qatar departament tergeý oblystyq polısııa basshylyǵynyń erekshe baqylaýynda ekenin atap ótti.
Quqyq qorǵaý organdary kúdiktiniń polısııa qyzmetkeri ekeni jónindegi áleýmettik jelilerde taraǵan aqparatty rastamady da, joqqa da shyǵarmady.
Vedomstvonyń aıtýynsha, ózge aqparattar QR Qylmystyq-prosestik kodeksiniń 201-babyna sáıkes jarııa etilmeıdi.
Oqıǵa 16 mamyrda Balqash aýdany Baqbaqty aýyly mańyndaǵy tasjolda bolǵan. Erli-zaıypty sózge kelip, er adam áıelin túsirip ketken. Sodan soń artynan qaıtadan baryp qaǵyp ketken. Áıel oqıǵa ornynda kóz jumǵan.
Eske salaıyq, buǵan deıin Almaty oblysyndaǵy kólik tizgindegen jasóspirim 12 jastaǵy balany qaǵyp ketkenin jazǵan edik.
