Foto: Ashyq derekkóz
Kólik mınıstri Nurlan Saýranbaev málim etkendeı, Tokıoǵa tikeleı reıster 2026 jyldyń IV toqsanynda, al AQSh-qa 2027 jyldyń II toqsanynda iske qosylady.
Qazirgi tańda Astanadan 34 halyqaralyq baǵyt boıynsha reıster oryndalyp jatyr. Jyl sońyna deıin taǵy 5 jańa baǵyt ashý jossparlanǵan.
Mınıstrdiń aıtýynsha, avıasııa salasynda jańa tehnologııalar da engizilip jatyr. Atap aıtqanda, qalalyq áýe taksıi (Urban Air Mobility) jobasy ázirlenip jatyr, sondaı-aq ınvestorlar testilik ushqyshsyz apparattardy satyp alýǵa kirisken.
Sonymen qatar ushý alańdary men operasııalyq ortalyqtyń qurylysy bastalǵan.
Aeroport ınfraqurylymyn jańǵyrtý jumystary da aldaǵy úsh jylda kezeń-kezeńimen júrgiziledi. Erekshe nazar iri áýejaılarǵa ǵana emes, óńirlik shaǵyn áýejaılarǵa da aýdarylmaq.
Prezıdent tapsyrmasyna sáıkes, týrıstik aımaqtarda jańa áýejaılar salý josparlanǵan. Atap aıtqanda, Qatonqaraǵaı, Zaısan jáne Kendirli aýmaqtarynda áýejaı qurylysy júrip jatyr. Sondaı-aq Arqalyq áýejaıyn qaıta jańartý qolǵa alynǵan.
N. Saýranbaevtyń aıtýynsha, avıasııa salasyn damytý úshin kadr daıarlaý máselesi de ózekti. Qazir salada 23 myń maman jumys isteıdi, al jyl saıyn keminde 500 jańa maman qajet.
Osy maqsatta sheteldik seriktespen birlesken sertıfıkattalǵan oqý ortalyǵyn ashý jospary qarastyrylyp jatyr.
