Foto: Aqorda
Olımpıada chempıony jazbasynda jalaqysyna baılanysty daýdan soń jańa málimdeme jasaýǵa týra kelgenin atap ótken.
Sportshynyń aıtýynsha, ol 2025 jyly barlyq talaptardy oryndaǵanyna qaramastan, áli kúnge deıin Qazaqstannyń eńbek sińirgen sport sheberi kýáligin almaǵan.
Sondaı-aq Shaıdorov ózi men komandasynyń sońǵy bes aıdan beri jalaqy almaǵanyn, al jańa maýsymǵa daıyndyqtyń is júzinde toqtap turǵanyn málimdedi. Budan bólek, ol 2026 jylǵa arnalǵan jańa kelisimshartta áli bolmaǵan aldaǵy Olımpıada oıyndarynyń medalin jeńip alý mindeti júktelgenin atap ótti.
«2026 jylǵa arnalǵan jańa kelisimshartty talqylaý úshin menimen jáne komandammen tek mamyr aıynyń ortasynda ǵana baılanysqa shyqty. Mende muny rastaıtyn hat almasý bar. Kelisimshart áli kelisilgen joq, biraq bul meniń somaǵa kelispeýimnen nemese kelýden bas tartýymnan bolyp otyrǵan joq. 2026 jyldyń sońyna deıingi merzimge jasalǵan kelisimshartta 2030 jylǵy Olımpıadada medal jeńip alý mindettemesi kórsetilgen», dedi Mıhaıl Shaıdorov.
Sportty damytý dıreksııasy Mıhaıl Shaıdorov jalaqysyna qatysty túsinik berdi
Sondaı-aq ol eger keshiktirilgen tólemder aýdarylsa, jınalǵan jalaqysynyń barlyǵyn balalarǵa kómek kórsetýge baǵyttaıtynyn jetkizdi.
«Meniń oıymsha, árkim óz jumysyn atqarýy kerek. Men – sportshymyn, meniń mindetim – kúnine úsh ret jattyǵýǵa shyǵý, men muny oryndap júrmin. Eger aldaǵy ýaqytta maýsymǵa arnalǵan qarjy bólinse, keshiktirilgen jalaqymnyń barlyǵyn Balalardy qorǵaý kúnine oraı balalarǵa kómek kórsetýge baǵyttaımyn», dedi ol.
Mánerlep syrǵanaýshy bul jaǵdaıdy jurtshylyqqa jarııa etkisi kelmegenin, alaıda óziniń atyna nuqsan keltirýge jol bere almaıtynyn aıtty.
Eske sala keteıik, Mıhaıl Shaıdorovtyń alǵashqy málimdemesine qatysty buǵan deıin birqatar olımpıada chempıondary pikir bildirgen bolatyn.
