Ekologııa erekshe kózqarasty talap etedi

Keshe Ábilǵazy Qusaıynov Almatyda birqatar kásiporyn jumysshylarymen kezdesýler ótkizdi. Alǵashqy kezesý «OBIS» Kompanııa» JShS-inde ótti. Onda Á.Qusaıynov ekologııalyq jáne ónerkásiptik qaýipsizdik máselesin kóterdi. «Búginde ǵalamshardy aınalǵan ozon qabatynyń buzylýy, álem muhıttaryndaǵy sýdyń lastanýy, jerdiń lastanýy, topyraqtyń qunarsyzdanýy, bıologııalyq tirshiliktiń azýy jáne t.b. máseleler ózekti bolyp tabylady. Qazirgi ýaqytta ekologııa bıologııanyń sheńberinen shyǵyp, adamzattyń qorshaǵan ortamen qarym-qatynasyn zertteıtin pánaralyq ǵylymǵa aınaldy», dedi kezdesýdegi sózinde prezıdenttikke kandıdat. Sodan keıin ol ekologııa «adam – tabıǵat» problemasyn zertteýde kúrdeli ári uzaq joldan ótkenin atap kórsetti. Adam men tabıǵat arasyndaǵy qarym-qatynastyń ózindik ereksheligi bar ekenine nazar aýdardy. «Adamǵa sana berildi, sol arqyly ol tabıǵatta alatyn ornyn aıqyndap, Jer júzinde óz jaratylysynyń mánin túsinýge múmkindik aldy. Qazirde ekologııany «adamzattyń jeke úıi» – bıosfera týraly, onyń erekshelikteri, adammen qarym-qatynasy jáne baılanysy, al adamnyń jalpy qoǵammen baılanysy týraly ǵylym dep te atap júr», dedi Á.Qusaıynov. Prezıdenttikke kandıdat ekologııa bıologııa sheńberindegi derbessiz pánnen keshendi pánaralyq ǵylymǵa – aıqyn dúnıetanymdyq mazmuny bar zamanaýı ekologııaǵa aınalǵanyn da atap ótti. Búgingi kúni ekologııa tiri organızmderdiń qorshaǵan ortamen baılanysy týraly bıologııalyq ǵylym degen bastapqy túsiniginen alshaq birneshe ǵylymı salalarǵa jáne pánderge bólinetinin kóldeneń tarta kelip, Á.Qusaıynov sózin tómendegishe túıindedi: – Qazirgi zamanǵy ekologııa tek bıologııanyń ǵana emes, jalpy, jaratylystaný ǵylymdarynyń sheńberinen daralanyp shyqty. Zamanaýı ekologııanyń ıdeıalary men qaǵıdalary dúnıetanymdyq mazmunǵa ıe, sonyń negizinde ekologııa adamzat jáne mádenıet týraly ǵylymdarmen ǵana emes, sondaı-aq, fılosofııamen de tyǵyz baılanysta. Júz jyldan astam tarıhy bar ǵylymnyń osynshalyqty ózgeriske ushyraýyna qarap, zamanaýı ekologııa serpindi damýshy ǵylym degen qorytyndy jasaýǵa bolady, – dedi Á.Qusaıynov. Jalpy alǵanda, Á.Qusaıynov pen jumysshylar arasyndaǵy kezdesý mazmundy ári qyzyqty ótti. Qorǵanbek AMANJOL, «Egemen Qazaqstan». ALMATY.