Batysqa elikteý – batpaqqa batý degen sóz

Keshe el prezıdenttigine kandıdat Turǵyn Syzdyqov saılaýaldy naýqannyń aıasynda Kókshetaý qalasynda birqatar kezdesýler ótkizdi. Eń birinshi kezekte kandıdat «Kókshe» akademııasynyń stýdentterimen kezdesti. Kezdesýdiń moderatory QKHP Aqmola oblystyq komıtetiniń birinshi hatshysy Beısenbaı Májıtov boldy. T.Syzdyqov óz sózinde batys mádenıeti bizdiń jastarǵa teris yqpal etip otyrǵanyn aıtty. «Gollıvýd fılmderi men batystyń kompıýterlik oıyndarynda qatygezdik kórinister jıi oryn alady. Batys mádenıeti búginde zorlyq-zombylyqqa toly. Olar ózin ózi jetildirip, damytqysy kelmeıdi. Batystyń tamaqtaný júıesi, fast-fýd pen túrli genetıkalyq ózgeriske ushyraǵan ónimderdi paıdalaný densaýlyqqa qaýip tóndiredi. Munyń bári az shyǵyndalyp, ózderine mol tabys ákelý maqsatyn kózdep otyr. Al zııan­dy tamaqtardy paıdalaný alýan túrli aýrýlarǵa ákeledi», dedi prezıdenttikke kandıdat. Kelesi kezekte T.Syzdyqov batys elderi durys tamaqtanbaı, salamatty ómir saltyn ustanbaǵannyń saldarynan semirý jáne kóptegen aýrýlar boıynsha álem elderi arasynda kósh bastap turǵanyn atap kórsetti. Keıin kandıdat T.Syzdyqov «Kók­she­taýmınvody» JShS kásipornynyń jumysshylarymen kezdesti. Bul sha­rany QKHP Aqmola oblystyq komı­tetiniń birinshi hatshysy Beısenbaı Má­jıtov ashty. Mundaǵy kezdesýde de prezıdenttikke kandıdat sózin tómen­degishe sabaqtady: «Barlyq kompıýterlik oıyndarda erekshe vırýstar bar. Olar balalardyń sanasyna tereń sińip, jastardy bas­qyn­shylyqqa ıtermeleıdi. Biz batys mádenıetiniń yqpalyn shekteýimiz kerek. Shetelder ozbyrlyqty jappaı nası­hattap jatyr. Bul adamdy aqyl-esinen, adamgershiliginen aıyryp, adam ómirin qunsyzdandyrady». Sóziniń sońynda T.Syzdyqov bylaı dedi: – Sheteldiń kıimi, mýzykasy, fılmderi men serıaldary jastardyń sana-sezimin buzady. Batystyń ómir standarttary ondaǵy týý ósiminiń tómendeýine ákeldi. Ol jaqtyń jas­tary ózine júktelgen mindetterdi oryndaǵysy joq. Tipti, batys elderiniń mýltfılmderindegi keıipkerler bir-birin balaǵattap, óltirip júrgen jandar. Osyndaı batystyń ónimderi balalardy zorlyq-zombylyqqa «tárbıeleıdi». Gollıvýd standarttary jańa kıim-keshektiń, telefondardyń, teledıdardyń ómirdegi mánisi zor ekenine sendiredi. Adamnyń qarym-qatynasy qunsyzdanyp qaldy. Batysta adamdar bir-birimen tildesýden qaldy. Baqbergen AMALBEK, «Egemen Qazaqstan». KО́KShETAÝ.