Qarjy sektorynda tekserý qatań

Keshe Ortalyq kommýnıkasııalar qyzmetinde Qarjy mınıstriniń eki birdeı orynbasary baspasóz máslıhatyn ótkizdi. Onda «Nurly Jol» baǵdarlamasyn qarjylandyrý men ony durys ıgerý máseleleri sóz boldy. «Nurly Jol» baǵdarlamasy aıasynda Ulttyq qordan osy jyl­ǵa 686 mlrd. teńge bólinedi eken. «Baǵdarlamanyń bıýdjettik qarjylandyrý kólemi 423,5 mlrd. teńgeni quraıdy. Bıýdjettik qar­jylandyrý búginde bastalyp ta ketti. Tipti 23 mlrd. teńge ıgerilip te boldy. Iаǵnı, ol qarajat respýblıkalyq deńgeıdegi avtojoldardy salý jumystaryna baǵyttaldy. Negizi, ınfraqurylymdyq jobalarǵa – 207,8, qurylys jáne turǵyn úı-kommýnaldyq sharýashylyǵyn damytýǵa – 112,5, al halyqaralyq qarjy uıymdarymen birlesken jobalarda Qazaqstannyń úlesin qarjylandyrýǵa – 39,2, agro­ónerkásip keshenin qoldaýǵa – 20, mektepter salýǵa – 17,3, «Balapan» baǵdarlamasyna 12,7 mlrd. teńge qarastyrylǵan. Bularmen birge, JOO-lar men ǵylymı mekemelerdiń materıaldyq-tehnıkalyq bazasyn qalyptastyrý isine – 8, al geologııalyq barlaý jumystaryn júzege asyrýda 6 mlrd. teńge ıgerilmek», dedi Qarjy vıse-mınıstri Rýslan Dálenov. Onyń sózine qaraǵanda, «Báı­terek» holdıngi arqyly Ult­tyq qordan 262,5 mlrd. teńge oblıgasııalyq qaryz jalǵa beriletin baspana qurylysyna nesıe berýge, shaǵyn jáne orta bıznes jobalary men iri kásipkerlik sýbektilerin qarjylandyrýǵa, eksporttaýshylardy qoldaýǵa bó­linedi. Osy aıda atalǵan jeli boıynsha 20,3 mlrd. teńge turǵyn úıdi satyp alyp, ári qaraı halyq arasynda taratý úshin jumsalypty. Igerilgen qarjyny tolyq eseptegen mınıstrlik málimetinshe, búginge deıin Ulttyq qor qarjysynyń 40,3 mlrd. teńgesi qajetke jaratylǵan. Baspasóz máslıhatynda buqaraǵa jaǵymdy jańalyq ta aıtyldy. Úkimet avtokólik satyp alý úshin qazaqstandyqtarǵa jeńildetilgen nesıe berýge qarjy bólmek kórinedi. «Elimizdiń azamattary jeńildetilgen nesıemen tek otandyq kólikterge qol jetkize alady. Onyń mólsherlemesi 3 paıyzdan aspaıdy jáne 3-5 jyl merzimge negizdelgen. Nesıe teńgemen ǵana beriledi. Bul maqsatqa 15 mlrd. teńge bólinedi. Bul qarjy shamamen 4-6 myń avtokólikti satyp alýǵa jetedi dep oılaımyz», dedi R.Dálenov Bıýdjettik qarjyǵa satyp alýǵa josparlanǵan I sanattaǵy kólikke elimizdiń óńirlerinde bıýdjet qarjysy ártúrli somada qarastyrylypty. Bul týraly Qarjy vıse-mınıstri Ardaq Teńgebaev aıtty. «Memlekettik organdar memlekettik satyp alýǵa jarııalaǵan avtokólikterdiń qunyna taldaý júrgizdi. Sol taldaýdyń nátıjesi boıynsha kólikterdiń bir markisine respýblıkanyń túrli óńirinde baǵanyń árqıly ekenin anyqtady. Bul baǵanyń aıyrmashylyǵy eldiń keıbir aýmaǵynda 40 paıyzǵa deıin joǵary bolyp otyr», degen vıse-mınıstr, osy turǵyda barlyq bıýdjettik baǵdarlamalar ákimshilerine osy máseleni qarastyrý úshin nusqaý hat jiberilgenin málimdedi. Munymen birge, bıýdjet qarajatynyń tıimsiz jumsalýyn boldyrmaý úshin Qarjylyq baqylaý komıteti avtokólik satyp alýǵa arnalǵan shyǵystardy josparlaý kezinde qoldamaýǵa bolatyn júıeli usynystar qazirgi kezde ázirlenip jatyr eken. «Mundaı ju­mys memleket qarjysy ıgeri­letin baǵyttardyń barlyǵynda júr­giziletin bolady. Jumys toby is-qımyldarynyń joǵaryda aıtylǵan kestesi memlekettik satyp alýǵa qatysýshylardyń salyqtyq tártibin kóterýge, «Nurly Jol» baǵdarlamasyn iske asyrýǵa bólinetin qarjynyń, sondaı-aq búkil bıýdjet qarajatynyń tıimdi paıdalanylýyn qamtamasyz etýge múmkindik beredi», degen A.Teńgebaev qarjy sektorynda qatań tekserý bar ekenin meńzedi. Nurbaı ELMURATOV, «Egemen Qazaqstan».